WANANCHI WATAABIKA NA MAISHA

Kijiji cha Lunyere, kwa jina maarufu DarPori ambacho kipo umbali wa kilometa 98 kutoka Mbinga mjini, Ruvuma. Kijiji hiki kipo mpakani mwa Tanzania na Msumbiji wananchi wameilalamikia serikali kwa kushindwa kutengeneza barabara ya kutoka Mbinga mjini hadi huko, hali ya maisha yao ni mbaya kutokana na kukosa hata huduma za matibabu kama vile kituo cha afya au zahanati hakuna, tokea kijiji hicho kianzishwe mwaka 1992 na kusajiliwa rasmi mwaka 2003.(Picha na Kassian 
 Nyandindi)

Na Kassian Nyandindi,

Mbinga.

 

TUNAISHI kwa taabu serikali haitujali au kwasababu sisi tunaishi mpakani, miundombinu ya barabara kutoka Mbinga mjini kuja huku ni shida tupu, kilio chetu ni huduma za afya, maji na barabara.

 

Haya ndiyo maneno ya wakazi wa kijiji cha Lunyere kitongoji cha Darpori, wanaoishi katika kijiji hicho ambacho kipo umbali wa kilometa 98 kutoka Mbinga mjini.

 

Kijiji hicho kipo mpakani ambapo kinapakana na nchi ya Msumbiji upande wa Kusini na maisha kwenye kijiji hicho ambacho kipo mbali kuliko vyote katika Wilaya ya Mbinga mkoani Ruvuma , wananchi wake ni mchanganyiko wa makabila mbalimbali ambao hujishughulisha na kilimo, ufugaji, biashara na uchimbaji wa madini aina ya dhahabu.

 

Wakazi katika kijiji cha Lunyere wapo jumla 6060 Wanaume 3039 na Wanawake 302, hawana kituo cha kutolea huduma za afya, barabara zimekuwa mbaya na huduma ya maji kwao imekuwa ni shida.

WANAFUNZI HATARINI KUANGUKIWA NA JENGO WANALOSOMEA

Na Kassian Nyandindi,

Mbinga.

 

HUENDA maafa makubwa yatajitokeza katika shule ya Msingi Myangayanga, iliyopo kijiji cha Myangayanga Wilaya ya Mbinga mkoani Ruvuma , kutokana na jengo moja linalotumika kusomea wanafunzi kuwa katika hali mbaya.

 

Mwandishi wa habari hizi ambaye alitembelea shule hiyo ameshuhudia jengo hilo lilivyokuwa, ambapo ni chakavu na limekuwa na nyufa kubwa huku watoto na walimu wa shule hiyo wakiendelea kulitumia wakati wa vipindi vya masomo.

 

Jengo hilo ambalo lina vyumba vinne limekuwa likitumika kusomea wanafunzi wa darasa la awali, darasa la tatu na la nne na kwamba lina ofisi tatu za walimu hivyo huenda likabomoka wakati wowote.

 

Mwalimu mkuu wa shule hiyo Bw. Maxensius Kiyao ameliambia gazeti hili kwamba jumla ya wanafunzi 140 na walimu sita wakati wa masomo kwa siku hulitumia jengo hilo kutokana na upungufu wa vyumba vya kusomea, jambo ambalo ni hatari kwao.

 

Alisema jitihada za kulikarabati zimegonga mwamba kutokana na kukosa fedha, hivyo uongozi husika wa halmashauri ya kijiji cha Myangayanga na wa wilaya ya Mbinga, unapaswa kuchukua hatua za makusudi katika kunusuru hali hiyo ili lisiweze kuleta madhara makubwa baadaye.

RAIS KIKWETE AKIHUTUBIA WANANCHI KILIMANJARO

Rais Jakaya Kikwete akihutubia wananchi  wa wilaya ya Same Kilimanjaro Oktoba 28, mwaka huu. Rais alikuwa katika ziara ya siku nne katika mkoa huo akianzia wilaya ya Same.(Picha na asilia yetu blog)

WAKUBWA WAKIFURAHIA KUGONGANISHA GLASS

Kushoto mkuu wa wilaya ya Nyasa mkoani Ruvuma Bw. Ernest Kahindi, aliyekuwa mkuu wa wilaya ya mbinga Edmund Mjengwa, mkuu wa mkoa wa Ruvuma, Said Mwambungu, mkuu mpya wa wilaya Mbinga Bi. Senyi Ngaga na Mama Hanab Mwambungu (Mke wa mkuu huyo wa mkoa wa Ruvuma) wakijiandaa kugonga cheer's wakati wa sherehe ya kumuaga Bw. Mjengwa jana Mbinga mjini.

SHAIBU NNUNDUMA NA SAID MWAMBUNGU WAKISHEREHEKEA

 Bw. Shaibu Nnunduma ambaye ni mkurugenzi mtendaji wa Halmashauri ya wilaya Mbinga,   akigonganisha glass na mkuu wa mkoa wa Ruvuma Bw. Said Mwambungu wakati wa sherehe ya kumuaga aliyekuwa mkuu wa Wilaya hiyo Bw. Edmund Mjengwa.

EDMUND MJENGWA YULEE AKIAGA MBINGA

 Aliyekuwa mkuu wa wilaya ya Mbinga mkoani Ruvuma, Bw. Edmund Mjengwa akizungumza wakati wa sherehe yake ya kumuaga iliyofanyika Mbinga mjini mkoani humo. katikati ni mkuu wa mkoa wa Ruvuma Bw. Said Mwambungu na kulia mkuu mpya wa wilaya hiyo Bi. Senyi Ngaga.

MGOGORO WA ZIWA NYASA UMALIZWE KWA AMANI

Ziwa Nyasa ambalo lina mgogoro kati ya Wamalawi na Watanzania (Picha na Mwambije blog).  

MALAWI NA TANZANIA:

Hali ya wasiwasi imekuwa ikiendelea kuwepo kati ya Malawi na Tanzania kuhusu mzozo wa mpaka ambao umekuwa kwa miaka mingi lakini sasa umefika daraja la juu huku viongozi wa nchi hizo mbili wakiendelea kuumiza vichwa juu ya uhalisia wa mpaka huo.

Mzozo unahusu umiliki wa ziwa Malawi ambalo ni la tatu kwa ukubwa barani Afrika na ambalo linapakana na nchi ya Malawi, Tanzania na Msumbiji.

Tangu miaka ya sitini Tanzania na Malawi nchi hizi zimekuwa zikizozana kuhusu umiliki wa ziwa hilo, lakini mgogoro huu kwa sasa umekuwa ukijenga hofu kwa wananchi kutokana na kudaiwa kuwepo kwa gesi na mafuta katika ziwa hilo.

Msumbiji mpaka sasa haijahusika kwa namna moja au nyingine katika kujihusisha na mzozo huu.

WALIOJERUHIWA KATIKA VURUGU ZA UCHAGUZI WA UDIWANI SONGEA WAENDELEA VIZURI

Na Amon Mtega,

Songea.

  

WAFUASI wa Chama cha Mapinduzi (CCM) na CHADEMA ambao walijeruhiana katika mkutano wa mwisho wa kampeni za uchaguzi, kuwania nafasi ya udiwani kata ya Mletele iliyopo manispaa ya Songea mkoani Ruvuma, na kulazwa katika Hospitali ya Songea [HOMSO] sasa wanaendelea vizuri baada ya afya zao kuanza kurejea katika hali ya kawaida.

Mganga mkuu mfawidhi wa hospital hiyo Dkt.  Benedick Ngaiza alisema hayo wakati alipokuwa akizungumza na mwandishi wa habari hizi.

Dkt. Ngaiza alisema katika watu waliojeruhiwa wanne walitibiwa na kuondoka na waliokuwa wamelazwa walikuwa watatu ambao mpaka sasa bado wanaendelea na matibabu ambapo mmoja ni Mashaka Mbawala [45] aliumizwa mikononi na kichwani.

MAMA PINDA NA MAONYESHO

Mama Tunu Pinda (katikati) akiwa katika picha ya pamoja baada ya kufungua maonyesho ya MOWE 2012. (Picha na Michuzi blog)

WANAOBEZA YALIYOFANYWA NA MWALIMU NYERERE WAPUUZWE

 Hayati Mwalimu Julius Kambarage Nyerere. (Picha na mtandao)

Na Dustan Ndunguru,

Songea.

PADRE wa kanisa la Roman Katoliki Bw. John Chacha  ambaye pia ni makamu mkuu wa chuo kikuu cha SAUT tawi la Songea  mkoani, ameshangazwa na baadhi ya watu ambao wanaobeza kazi  zilizofanywa na hayati Mwalimu Julius Kambarage Nyerere, kwa kusema hazikuwa na tija katika Taifa hili.

Kauli hiyo aliitoa wakati wa mahubiri ya ibada ya jumapili ambayo ilikuwa ni siku ya watakatifu waliyoishi kwa uadilifu kwa kumcha Mungu, pamoja na utii mbele ya jamii ambayo iliyokuwa ikiwazunguka.

Akihubiri katika kanisa la mtakatifu Mathias Mlumba Kalemba jimbo kuu la Songea Padre Chacha alisema, kumekuwa na tabia iliyozoeleka kwa baadhi ya watu kubeza kazi zilizofanywa na waasisi wa nchi ambao walikuwa wanajituma usiku kucha kuhakikisha taifa  linakwenda sawa bila upendeleo.

               

“Ninashangazwa  sana kuona baadhi ya watu wamekuwa wakibeza kazi zilizofanywa na mwalimu Nyerere, pamoja na wenzake na kusema kuwa suala la ufisadi  lilikuwepo tangu enzi za mwalimu jambo ambalo ni ukosefu wa fikra za kichambuzi na uwiano wa kihistoria”

  

“Kwa kumbukumbu yangu mwalimu Nyerere aliwahi kugoma kujengewa nyumba akasema kwa vile napenda kusoma vitabu na maktaba yangu imechakaa naomba mnitengenezee, ili vitabu vyangu vikae sehemu nzuri, lakini kwa mtanzania wa sasa akiambiwa hivyo tu ndio wa kwanza kufuatilia ahadi hiyo bila hata kuwa na uwoga wowote”, alisema Padre huyo.

VIJANA WASHAURIWA KUJIUNGA NA VYUO VYA UFUNDI STADI

  


Waziri wa elimu na mafunzo ya ufundi stadi Dkt. Shukuru Kawambwa. (Picha na mtandao)

Na Mwandishi wetu,

Songea.

VIJANA mkoani Ruvuma wametakiwa kubadilika kimawazo na kuacha tabia ya kusubiri ajira za serikali na taasisi za umma, badala yake wajiunge katika vyuo vya ufundi stadi (VETA) ili waweze kupata ujuzi utakaowafanya wajiajiri wenyewe na kumudu kuendesha maisha yao.

Wito huo umetolewa na mkuu wa chuo cha Veta Songea Bw. Gideon Ole Ruimbe wakati akizungumzia mpango wa chuo hicho kupanua wigo wa mafunzo ili kuwawezesha vijana wengi kupata ujuzi utakaowafanya waweze kujitegemea na kukabiliana na changamoto mbalimbali.

Bw. Ole Ruimbe alisema wakati umefika kwa vijana hapa nchini, kupanua fikra zao zaidi na kuangalia mustakabali wa maisha yao, kutokana na tatizo kubwa la ajira lililopo sasa.

SHULE YA MSINGI NGADINDA SONGEA VIJIJINI WAJISAIDIA VICHAKANI

Wanafunzi wa darasa la awali shule ya msingi Masumuni iliyopo wilayani Mbinga mkoa wa Ruvuma, wakiwa wamepanga foleni kwenda kupokea uji kwa ajili ya kifungua kinywa majira ya asubuhi kama walivyokutwa na mpiga picha wetu. Serikali hapa nchini imekuwa ikisisitiza shule nyingi kutoa huduma ya chakula kwa wanafunzi mashuleni ili waweze kuondokana na njaa na hatimaye wafanye masomo yao vizuri. (Picha na Kassian Nyandindi)

Na Dustan Ndunguru,

Songea.

WANAFUNZI na walimu wa shule ya msingi Sokoine kijiji cha Ngadinda Songea vijijini mkoani Ruvuma, wanalazimika kujisaidia vichakani kutokana na uhaba wa vyoo uliopo shuleni hapo.

Shule hiyo inakabiliwa na changamoto nyingi kutokana na uchanga wake, hivyo jitihada za kuinusuru ili iweze kuondokana na matatizo hayo zinahitajika kwa uharaka zaidi ili wanafunzi na walimu wasipatwe na magonjwa ya mlipuko.

Akizungumza na mwandishi wa habari hizi, mwalimu mkuu wa shule hiyo  Bw. Theoderi Moyo alisema, mahitaji halisi ya matundu ya vyoo ni 16  na sasa shule ina matundu manne tu ambayo hayatoshelezi.

Kutokana na hilo walimu wamekuwa wakijisaidia katika vyoo vya nyumba za watu wanaoishi jirani na shule hiyo.

JITIHADA ZA KUPAMBANA NA MALARIA ZINAHITAJIKA ZAIDI

Mratibu wa Malaria mkoani Ruvuma Bi. Kibua Kakolwa.  (Picha na Kassian Nyandindi)

Na Kassian Nyandindi, 

Songea.

 

UGONJWA ambao ni tishio kwa maisha ya wananchi wengi ni malaria, na hususani kwa wale walio maskini duniani ndio huteseka nao kwa kiasi kikubwa , hivyo jitihada za kuendelea kupambana nao katika kuutokomeza zinahitajika zaidi ili jamii iweze kusonga mbele kimaendeleo.

 

Ni ugonjwa unaoenezwa na mbu jike aina ya Anofelesi mwenye vimelea vya ugonjwa huo, kwa kuuma na kufyonza damu ya mtu asiye na vimelea hivyo kisha kumuambukiza.

 

Hapa kwetu Tanzania ugonjwa wa malaria umekuwa tishio kwa maisha ya wananchi wengi, hususani akina mama wajawazito na watoto wadogo wenye umri chini ya miaka mitano, ambao kutokana na mdudu huyo anayeambukiza kumekuwa na ongezeko kubwa la idadi ya vifo vitokanavyo na ugonjwa huo.

 

Watu zaidi ya milioni 20 inakadiriwa wanaokwenda hospitali kupatiwa matibabu kila mwaka hapa nchini, hugundulika kuwa na vijidudu vya ugonjwa huu ambapo kati ya hao 60,000 hufariki dunia wengi wao wakiwa watoto walio chini ya umri huo.

 

Katika nchi za Afrika Mashariki inakadiriwa kuwa na wagonjwa milioni 60 na watu milioni moja huripotiwa kufa duniani kila mwaka.

 

Watu 291 huripotiwa kufa kila siku kutokana na ugonjwa huo wengi wao wakiwa watoto wadogo, ambapo takwimu hizo zinafafanua kuwa kila baada ya saa moja watu wanaokufa kwa ugonjwa huu ni zaidi ya kumi.

WIZI WA MADAWA WAKITHIRI MBINGA

Na Kassian Nyandindi,

Mbinga.

MADIWANI wa Halmashauri ya wilaya ya Mbinga mkoani Ruvuma, wameulalamikia uongozi wa idara ya afya wilayani humo, kwa kushindwa kudhibiti vitendo vya wizi wa madawa ya kutibu wagonjwa, ambao umekuwa ukifanyika katika hospitali ya wilaya hiyo.

Sambamba na hilo imeelezwa katika kikao hicho kwamba licha ya tatizo hilo kuwepo, pia kumekuwa na upungufu mkubwa wa madawa hayo katika zahanati na vituo vya afya.

Malalamiko hayo yalitolewa hivi karibuni katika kikao cha baraza la madiwani kilichoketi kwenye ukumbi wa jumba la maendeleo uliopo mjini hapa.

Walisema dawa zinazosafirishwa na kupelekwa katika vituo vya afya au zahanati huko vijijini, wakati mwingine zimekuwa hazifikishwi kwenye maeneo husika, jambo ambalo limekuwa likisababisha wagonjwa kukosa matibabu.

CCM YAIBUKA KIDEDEA RUVUMA

                       








Bendera ya Chama Cha Mapinduzi (CCM)


Kassian Nyandindi,

Songea.
 
CHAMA cha mapinduzi(CCM) mkoani Ruvuma, kimeibuka kidedea baada ya kuvibwaga vyama vya upinzani CHADEMA na CUF katika uchaguzi mdogo wa nafasi ya udiwani uliofanyika kata za Mpepai na Mletele.

Katika kata ya Mpepai iliyopo wilayani Mbinga, mgombea wa CCM Bw. Francis Nchimbi aliibuka mshindi baada ya kujizolea kura 1449, Bw. Romanus Mbena wa CHADEMA alipata kura 289 na Bw. Bosco Ndunguru wa CUF alipata kura 44.

TATIZO LA MAJI SONGEA ALAUMIWE NANI?

Baadhi ya wakazi wa Manispaa ya Songea mkoani Ruvuma wakiwa kwenye foleni wakisubiri kuchota maji, hivi sasa tatizo la maji katika Manispaa hiyo imekuwa ni kero kubwa ambapo upatikanaji wake ni wa shida. (Picha kwa hisani ya Demasho blog).

 

 
Na Kassian Nyandindi,

Songea.

UPATIKANAJI wa maji safi na salama ni tatizo ambalo limekuwa likiitesa jamii katika maeneo mbalimbali hapa nchini, na kusababisha hata maendeleo husika kurudi nyuma.

Maji ni kitu muhimu ambacho kiumbe chochote kilicho hai hapa duniani, hutegemea kuendesha maisha yake ya kila siku kwa kutumia nishati hiyo muhimu na ndio maana wananchi husisitizwa kutunza vyanzo vya maji ili visiweze kupotea.

Ni jambo la kushangaza kuona watu wanaendesha shughuli za kilimo katika vyanzo hivyo, huku viongozi husika wakikaa kimya na kuwaangalia bila kuchukua hatua stahiki, ambayo itaweza kukomesha hali hiyo.

Binafsi napenda kuelezea tatizo la upatikanaji wa maji safi na salama katika manispaa ya Songea mkoani Ruvuma, ambapo takribani ni miezi miwili sasa imepita, wakazi wa manispaa hiyo wamekuwa wakikabiliwa na tatizo la upatikanaji wa maji na kulazimika kuyatafuta umbali mrefu.

Tatizo hilo linasababishwa na uzembe uliofanywa na wakazi wa manispaa hiyo kutokana na kuharibu vyanzo vya maji katika milima ya Matogoro na maeneo mengine kuzunguka mji wa Songea.