TANESCO MBINGA LAWAMANI

Na Kassian Nyandindi,

Mbinga.

WAKAZI wa mji wa Mbinga mkoani Ruvuma, wamelilalamikia shirika la ugavi wa umeme Tanzania(TANESCO) tawi  la wilaya ya Mbinga mkoani  humo, kwa kutochukua hatua za haraka kutatua tatizo la upatikanaji wa umeme katika maeneo ya viwanda na mashine ya kukobolea nafaka.

Kero hiyo imekuwa ikijitokeza hata katika majumba ya kuishi watu, ambapo nishati hiyo muhimu imekuwa ikipatikana kwa mgawo na kusababisha adha kubwa kwa watumiaji.

Wakizungumza na waandishi wa habari kwa nyakati tofauti, wakazi wa mji huo walisema kuwa tatizo hilo lilianza kujitokeza Desemba 31 mwaka huu majira ya mchana, huku wakiomba uongozi husika wa shirika hilo kuchukua hatua za makusudi kunusuru hali hiyo.

Walisema hivi sasa katika maeneo ya viwanda na mashine ya kukobolea nafaka hapa Mbinga mjini, wanakosa huduma husika kutoka katika maeneo hayo na kuwafanya shughuli zao za kimaendeleo zishindwe kutekelezwa ipasavyo.

Akizungumza na waandishi wa habari ofisini kwake Meneja wa TANESCO wilaya ya Mbinga Kanut Punguti alikiri kuwepo kwa tatizo hilo, huku akisema limetokana na kuzidiwa kwa Transfoma ambayo hutumika kusambazia umeme katika maeneo ya viwanda na mashine hizo.

Punguti alisema hivi sasa umeme unaosambazwa katika mji huo sio wa uhakika hivyo, ofisi yake inafanya mawasiliano na ofisi husika ili waweze kuletewa transfoma nyingine kwa ajili ya kuongeza nguvu ya usambazaji wa nishati hiyo.

“Majira ya saa nane mchana Desemba 31 mwaka jana, ndipo tatizo hili lilianza kujitokeza baada ya wateja wetu kutupigia simu kuwa transfoma iliyopo eneo la ofisi za idara ya ujenzi inatoa moshi na sisi tulipoichunguza tulibaini kuwa imezidiwa”, alisema.

Hata hivyo Meneja huyo alisema kasi ya upatikanaji wa transfoma nyingine itategemea na mchakato utakaofanywa na uongozi wa shirika la ugavi wa umeme kwa ngazi ya mkoa.