MBINGA YA KWANZA KITAIFA KUFANYA VIZURI KIELIMU

Na Kassian Nyandindi,

Ruvuma.

NAIBU Waziri wa elimu na mafunzo ya ufundi, Jenister Mhagama ameipongeza wilaya ya Mbinga mkoani Ruvuma kuwa ya kwanza kitaifa kufanya vizuri kielimu kwa shule za msingi, katika maendeleo ya mpango wa kipimo cha matokeo makubwa hapa nchini (BRN).

Mhagama alitoa pongezi hizo wakati alipokuwa akizungumza na wakazi wa mji wa Mbinga, na kusema kuwa matokeo hayo yametokana na viongozi wa wilaya hiyo kushirikiana ipasavyo na walimu katika kutekeleza majukumu yao ya kazi.

“Wilaya hii ya Mbinga imekuwa mstari wa mbele katika kujitolea kuboresha maendeleo kwenye sekta ya elimu, nawapongeza sana nawaomba endelezeni jitihada hizi kwa faida ya kizazi chetu cha sasa na baadae”, alisema Mhagama.

Waziri huyo alieleza kuwa serikali katika bajeti ya fedha mwaka huu, imetenga shilingi bilioni 43 kwa ajili ya kuboresha kitengo cha ukaguzi hapa nchini ili kiweze kuendelea kufanya kazi zake za ukaguzi kwa ufasaha kwa shule za msingi na sekondari.   

Vilevile aliongeza kuwa kwa wilaya ya Mbinga shilingi milioni 176 shule za sekondari wilayani humo zimepewa kwa ajili ya kuboresha miundombinu husika.

Hata hivyo alitolea ufafanuzi juu ya tatizo la upungufu wa walimu wa masomo ya sayansi wilayani hapa, kwamba serikali inalifanyia kazi na watakapopatikana wakati wowote itawaleta ili kuweza kumaliza changamoto hiyo.