SERIKALI YAOMBWA KUMCHUKULIA HATUA AFISA TAALUMA WILAYA YA MBINGA

Waziri wa elimu na mafunzo ya ufundi, Shukuru Kawambwa.

Na Kassian Nyandindi,

Mbinga.

SERIKALI imeombwa kumchukulia hatua za kinidhamu afisa taaluma wa elimu ya msingi katika Halmashauri ya wilaya ya Mbinga mkoani Ruvuma, Bw. Rashid Pilli  kufuatia kutajwa kuwa ni kikwazo kikubwa cha maendeleo katika sekta ya elimu wilayani humo, licha ya serikali ya wilaya hiyo kufanya juhudi zake za kuongeza kiwango cha taaluma.

Pilli  anadaiwa kuwa chanzo cha vurugu na migogoro ya muda mrefu  isiyokwisha ambayo inaendelea kufukuta katika idara ya elimu ya msingi  kwa kuendesha mapambano  dhidi ya afisa elimu ya msingi   Bw. Mathias Mkali,  na hata kufikia hatua ya kumchonganisha kwa serikali pamoja  na walimu  mashuleni jambo ambalo linamvunja moyo utendaji wa kazi wa afisa elimu huyo katika jitihada zake za kuinua kiwango cha elimu wilayani humo.

Habari zinasema licha ya matukio hayo ya mara kwa mara ambayo kwa sasa yamekuwa ni kero kwa watumishi wengine inadaiwa kwamba kuna baadhi ya  vigogo wa halmashauri hiyo na hata watendaji wa serikali ya wilaya ya Mbinga, akiwemo mtumishi wa idara nyeti ya serikali wilayani humo, ambao wanamkingia kifua  Pilli  kwa maslahi yao binafsi.

Katika kikao cha tathimini ya elimu kilichoketi hivi karibuni mjini  hapa chini ya Mwenyekiti wake mkuu wa wilaya hiyo Senyi Ngaga, baadhi ya wadau wa elimu na madiwani wa halmashauri ya wilaya hiyo waliitaka  serikali kutomfumbia macho afisa huyo kutokana na kusababisha migogoro ya mara kwa mara ambayo haina tija katika jamii.

Akizungumza kwa masharti ya kutotajwa jina lake, mmoja wa wadau hao alisema Pilli ndiyo kikwazo namba moja cha elimu katika wilaya ya Mbinga, lakini anashangaa hadi sasa serikali imekaa kimya licha ya wadau wa elimu kutaka aondolewe wilayani humo kwani mambo hayo anayoyafanya ni  sumu kubwa katika maendeleo ya sekta hiyo muhimu.

Kwa upande wake afisa elimu ya msingi Bw. Mathias Mkali alikiri kuwepo kwa mgogoro huo, ambao alisema sasa ni wa muda mrefu na kueleza kuwa hayo yote yanafanyika kwa vile kuna vigogo wa wilaya na hata mkoa ambao wamekuwa wakimkingia kifua Bw. Pilli ili asichukuliwe hatua za kinidhamu.

Bw. Mkali aliongeza kuwa,  chanzo cha mgogoro huo ni kutokana na maslahi binafsi waliyonayo vigogo hao akiwemo aliyekuwa Mkurugenzi wa wilaya hiyo ambaye sasa amehamishwa kwenda wilaya mpya ya Nyasa Shaibu Nnunduma, Mwenyekiti wa halmashauri ya Nyasa Oddo Mwisho na baadhi ya maafisa (majina tunayo) ambao pia wanatajwa kushiriki katika mgogoro huo.

Alipotafutwa kuzungumzia tuhuma hizo, afisa taaluma Bw. Pilli alikanusha vikali kuwepo kwa  mgogoro huo na kuongeza kuwa kilichopo ni tofauti za kawaida kati yake na bosi wake, hivyo haoni kama ni vurugu ambazo zinachangia kukwamisha maendeleo ya elimu wilayani humo.