WAZIRI MKUU MAJALIWA ASHANGAZWA NA VIONGOZI WA USHIRIKA SONGEA KUTAKA KUJENGA VIBANDA VYA BIASHARA KATIKA JENGO LA KIWANDA CHA KUSINDIKA TUMBAKU

Waziri Mkuu, Majaliwa Kassim Majaliwa kulia, akisalimiana jana na Mkuu wa mkoa wa Ruvuma, Said Mwambungu mara baada ya kuwasili uwanja wa ndege wa songea, kwa ajili ya kuanza ziara yake ya siku tatu mkoani humo.

Na Kassian Nyandindi,

Songea.

WAZIRI Mkuu wa Jamhuri ya Muungano wa Tanzania, Majaliwa Kassim Majaliwa amemuagiza Mkuu wa mkoa huo, Said Mwambungu ahakikishe kwamba kabla hajamaliza ziara yake ya siku tatu anahitaji kuonana na viongozi wa Chama Kikuu cha Ushirika cha Tumbaku wilaya ya Songea na Namtumbo (SONAMCU) mkoani humo.

Agizo la Waziri mkuu huyo, amelitoa leo wakati alipokuwa Ikulu ndogo ya Songea kufuatia kusuasua kwa uzalishaji wa zao la tumbaku na kutofanya kazi kwa muda wa miaka 18 kiwanda cha kusindika zao hilo kilichopo Manispaa ya Songea mkoani hapa.

“Kabla sijamaliza ziara yangu, nahitaji kuonana na viongozi wote wa chama hiki kikuu cha uzalishaji wa tumbaku na mwakilishi mmoja mmoja kwa kila mkulima, ili niweze kupata mpango wao mkakati wa uendelezaji wa zao hili sambamba na ufufuaji wa kiwanda”, alisisitiza Majaliwa.

Kiwanda cha kusindika tumbaku ambacho kinajulikana kwa jina la SONTOP kilichopo katika Manispaa hiyo, kilisimama kusindika zao hilo kufuatia kuingiwa kwa mikataba mibovu kwa baadhi ya viongozi iliyoambatana na ubadhirifu wa fedha ambao ulisababisha kiwanda hicho kishindwe kujiendesha.

Aidha katika mikataba hiyo, ambayo ina makampuni yanayonunua zao hilo mkoani Ruvuma, iliweka masharti ya kusindika tumbaku kwa kutumia viwanda vilivyoko mkoani Morogoro jambo ambalo mkoa huo hauzalishi zao hilo na kwamba umesababisha kupoteza ajira za vijana takribani 2,500 waliokuwa wakifanya kazi katika kiwanda hicho.

Waziri Mkuu Majaliwa ameshangazwa pia na uongozi wa chama hicho kikuu cha ushirika cha SONAMCU, kutaka kulitumia eneo la kiwanda hicho cha kusindika tumbaku kilichopo mjini Songea, kujenga vibanda vya biashara badala ya kufikiria ni namna gani watafufua kiwanda hicho.

Vilevile Majaliwa alishitushwa na hali hiyo ambayo imesababisha kushuka kwa uzalishaji wa zao la tumbaku mkoani humo, ambalo lilikuwa ni tegemeo kubwa kwa kukuza uchumi wa wananchi wa wilaya za Namtumbo, Songea na Mbinga.

Kadhalika wakati haya yote yakitokea, mkoa wa Ruvuma unategemea sekta ya kilimo ambapo wakazi wake asilimia 90 ni wakulima, huku dhamira ya serikali ya awamu ya tano ikionesha kusimamia kikamilifu sekta ya kilimo chenye tija nchini sanjari na ufufuaji wa viwanda ili kuifikisha nchi katika uchumi wa kati.

Hata hivyo kuwepo kwa sakata hilo, Mkuu wa mkoa wa Ruvuma Said Mwambungu alimweleza Waziri Mkuu kwamba, tayari hatua za kisheria zimechukuliwa dhidi ya viongozi wa vyama vya msingi vya ushirika na chama kikuu SONAMCU wanaodaiwa kuhusika na ufisadi huo, tayari wamefikishwa Mahakamani.