GAMA: NITAHAKIKISHA KINU CHA KUSINDIKA TUMBAKU KINAFANYA KAZI

Leonidas Gama akifurahia jambo na wapiga kura wake, katika moja ya mikutano yake ya kampeni jimbo la Songea mjini mkoani Ruvuma.

Na Muhidin Amri,

Songea.

MGOMBEA ubunge wa Jimbo la Songea mjini mkoani Ruvuma, kupitia tiketi ya Chama Cha Mapinduzi (CCM) Leonidas Gama amesema iwapo wananchi wa jimbo hilo watamchagua kuwa mbunge wao, atahakikisha anarudisha kinu cha kusindika zao la tumbaku kikiwa kinafanya kazi ambacho kimejengwa jimboni humo kwa miaka mingi.

Mbali na hilo, Gama ameahidi kwa wananchi wake kwamba atakuwa mstari wa mbele kuhakikisha wakulima wa zao la mahindi, wanapata soko la uhakika la kuuzia mazao yao ili waweze kunufaika nalo na kuwafanya wasonge mbele kimaendeleo.

Gama ametoa ahadi hiyo juzi, alipokuwa akizungumza kwenye mkutano wake wa kampeni katika kata ya Mshangano mjini hapa ambapo pia wanachama 20, wa Chama Cha Demokrasia na Maendeleo (CHADEMA) walirudisha kadi za chama hicho na kujiunga na chama cha mapinduzi.

Alisema wananchi wa wilaya ya Songea ni wakulima wazuri wa mazao ya chakula na biashara, hivyo wanashindwa kupiga hatua mbele kutokana na kuwepo kwa mizengwe ya hapa na pale wakati wa kuuza mazao yao, kwani wajanja wachache wamekuwa wakiibuka na kwenda mashambani kununua mazao yao kwa bei ya chini, tofauti na bei iliyopangwa na serikali.

Pamoja na mambo mengine, aliwaahidi wafanyabiashara wadogo maarufu kwa jina la wamachinga, mama ntilie, wauza mchicha na matunda kwamba wakimchagua kuwa mbunge wao atafuta ushuru mdogo ambao umekuwa kero kubwa kwao na kuwataka askari mgambo, kuacha kuwanyanyasa wafanyabiashara hao.

Akizungumza huku akishangiliwa na umati mkubwa wa watu, Gama alisema kuwa wilaya hiyo ina fursa nyingi za kiuchumi zinazoweza kufanya mapinduzi makubwa ya kimaendeleo, lakini hilo litafanikiwa tu endapo wananchi wa jimbo hilo watatimiza adhima yao ya kumchagua kwa kura nyingi.