KAYA MASKINI SONGEA KUPOKEA RUZUKU KWA MFUMO WA KIELEKTRONIKI

Na Julius Konala,    

Songea.

KAYA maskini 615 ambazo zimeibuliwa kupitia Mfuko wa Maendeleo ya Jamii (TASAF) awamu ya tatu katika Halmashauri ya Manispaa ya Songea mkoani Ruvuma, wanatarajia kunufaika na utaratibu mpya uliowekwa na Serikali namna ya kupokea ruzuku zao kwa njia ya mfumo wa Kielektroniki, mapema mwezi Julai mwaka huu.

Aniceth Kyaruzi ambaye ni Afisa ufuatiliaji wa mfuko huo katika Manispaa hiyo, alisema kuwa utaratibu huo mpya utaanza kwa majaribio kwa kaya ambazo zitakuwa tayari kujiunga na mfumo huo.

Kyaruzi alisema kuwa Manispaa ya Songea ina jumla ya walengwa 4,968 ambapo kati ya hao waliojitokeza mpaka sasa kujiunga na utaratibu huo wa malipo kwa njia ya Kielektroniki ni 615 wanatoka katika mitaa 53 iliyopo mjini hapa ambayo utekelezaji wa mpango wa kunusuru kaya maskini umekuwa ukifanyika.

Idadi hiyo ya walengwa alieleza kuwa ni sawa na asilimia 12 ya walengwa wote waliopo na kwamba kigezo kikubwa kinachozingatiwa ni mlengwa wa mfuko wa TASAF anapaswa kumiliki simu au akaunti ya benki, ambayo atakuwa akitumia kupokea fedha za ruzuku.

Alifafanua kuwa kaya 4,353 hazikuweza kujiunga na mfumo huo kutokana na changamoto mbalimbali ikiwemo kutumia simu ambazo hazikusajiliwa kwa majina yao, kumiliki simu walizopewa na ndugu zao pamoja na kutojua kusoma na kuandika.

Kyaruzi aliitaja changamoto nyingine kuwa ni baadhi ya wazee wenye umri mkubwa kushindwa kumudu kwenda sambamba na utaratibu huo mpya ambao utaweza kuwalipa fedha hizo kwa njia ya mfumo wa Kielektroniki.

Pia Afisa ufuatiliaji huyo aliongeza kuwa pamoja na walengwa wachache kujitokeza katika kuitikia wito wa kukubali mabadiliko ya malipo hayo kwa njia ya mfumo huo, tayari walengwa wapatao 356 walitoa ahadi ya kununua simu au kufungua akaunti benki ili waweze kunufaika na utaratibu huo ambao utawapunguzia adha ya kubeba fedha taslimu wakati wa kwenda kulipa katika kaya maskini.