SERIKALI MBINGA KUENDELEA KUWACHUKULIA HATUA WALANGUZI WA KAHAWA

Na Kassian Nyandindi,              

Mbinga.

MKUU wa wilaya ya Mbinga mkoani Ruvuma, Cosmas Nshenye amesema kwamba asilimia 80 ya kahawa inayozalishwa wilayani humo Wakulima wake hawauzi wao wenyewe katika minada ya kuuzia zao hilo, bali imekuwa ikiuzwa na Walanguzi hivyo serikali itaendelea na msako mkali wa kuwakamata watu wanaotumia mbinu hizo za ujanja kuwarubuni wakulima.

Cosmas Nshenye.

Nshenye alisema hayo juzi alipokuwa akitoa salamu za serikali kwenye kikao cha baraza la Madiwani wa halmashauri ya wilaya ya Mbinga, ambapo alieleza kuwa katika msimu wa uzalishaji kahawa mwaka huu makampuni kadhaa yalikamatwa na kupigwa faini baada ya kukiuka taratibu na sheria zilizowekwa juu ya manunuzi ya zao hilo.

Aidha alisisitiza juu ya makampuni hayo kuhakikisha kwamba yanalipa malipo ya ya pili ya mkulima na kuachana na biashara haramu ya magoma ambayo humnyonya mkulima na kumfanya aendelee kubaki kuwa maskini.

WENYEVITI NA WATENDAJI WA VIJIJI MBINGA WANYOSHEWA KIDOLE KWA KUTOSOMA MAPATO NA MATUMIZI YA FEDHA ZA WANANCHI

Na Kassian Nyandindi,           

Mbinga.

WENYEVITI na Watendaji wa vijiji na kata katika Halmashauri ya wilaya ya Mbinga mkoani Ruvuma, wamenyoshewa kidole na kuelezwa kuwa katika maeneo yao ya kazi wamekuwa hawasomi taarifa za mapato na matumizi na kuwafanya wananchi walalamikie hali hiyo, huku baadhi ya maeneo wengine wakigomea hata kushiriki katika kufanya shughuli za maendeleo.

Aidha imefafanuliwa kuwa kutokana na tatizo hilo kuendelea kushamiri na kuwa kero katika jamii, kuna kila sababu sasa kwa uongozi wa halmashauri hiyo kupitia kitengo chake cha ukaguzi wa ndani kumpeleka mkaguzi huyo ili aweze kufanya ukaguzi katika vijiji na kata zote, ambazo kuna taarifa zenye utata juu ya mapato na matumizi ya fedha za wananchi.

Madiwani wa halmashauri ya wilaya hiyo walilalamikia hali hiyo juzi kwa nyakati tofauti, katika kikao chao cha baraza la madiwani kilichoketi kwenye ukumbi wa Umati uliopo mjini hapa.

TUNDURU YATENGA MAENEO YA KUENDESHA KESI ZA WANAUME WANAOWAPA MIMBA WANAFUNZI WA KIKE

Mkuu wa wilaya ya Tunduru, Juma Homera akipata chakula cha mchana na baadhi ya wanafunzi wa shule ya msingi Mataka iliyopo wilayani humo.

Na Muhidin Amri,               

Tunduru.

WILAYA ya Tunduru imetenga maeneo maalum wilayani humo, kwa ajili ya kuendesha na kusikiliza kesi na mashauri mbalimbali yanayohusu Wanaume wanaowapa mimba watoto wa shule za msingi na sekondari wilayani hapa.

Hayo yalisemwa mwishoni mwa wiki na Mkuu wa wilaya  hiyo, Juma Homera wakati alipokuwa akizungumza na wanafunzi pamoja na wazazi wa shule ya sekondari ya wasichana ya Masonya, katika mahafali ya  11 ya kidato cha nne kwa wanafunzi wa shule hiyo.

Homera alieleza kuwa imebainika kuwa kushuka kwa ufaulu wa mitihani kwa wasichana wengi katika shule za sekondari wilayani humo, kunachangiwa kwa kiasi kikubwa na wanafunzi wa kike kujihusisha na mambo ya kimapenzi hivyo kuwafanya kutozingatia masomo yao ipasavyo.

KANISA LA AGAPE SONGEA LASIKITISHWA WAUMINI WAKE KUYUMBISHWA

Na Muhidin Amri,           

Songea.

WAUMINI wa Kanisa la AGAPE hapa mkoani Ruvuma, wametakiwa kutoyumbishwa na Waumini wa madhehebu mengine kwa lengo la kuhama Kanisa hilo, kwani imeelezwa kuwa endapo watafanya hivyo ni sawa na kuisaliti imani yao.

Askofu wa Kanisa hilo mkoani hapa, Asangalwisye Mwangakala alisema hayo juzi alipokuwa akizungumza na mwandishi wetu mjini hapa mara baada ya ibada ya kuwasimika Wachungaji 17 watakaofanya kazi ya kueneza injili katika maeneo mbalimbali mkoani humo.

Mwangakala alisema kuwa, hivi sasa kumekuwa na tabia kwa baadhi ya waumini wa madhehebu mengine kuwarubini waumini wake ili waweze kulihama Kanisa hilo, jambo ambalo likiendelea kufanyika linaweza kuleta chuki miongoni mwa Wakristo mkoani hapa.

WAKAZI MATETEREKA MADABA WADAIWA KUWEKEWA SUMU KWENYE CHANZO CHA MAJI SERIKALI YAOMBWA KUINGILIA KATI

Na Kassian Nyandindi,       

Songea.

WAKAZI waishio katika kijiji cha Matetereka katika kata ya Matetereka Jimbo la Madaba wilaya ya Songea mkoani Ruvuma, wameuomba uongozi wa mkoa huo kuingilia kati na kumchukulia hatua Mwenyekiti wa kijiji hicho, Remigius Njafula ambaye anatuhumiwa kuwalinda kwa kuwakumbatia baadhi ya wananchi wanaolalamikiwa kuweka sumu katika chanzo cha maji kinachotumiwa na wananchi hao.

Mkuu wa mkoa Ruvuma, Dkt. Binilith Mahenge.

Aidha kufuatia tukio hilo wameuomba pia uongozi huo wa mkoa kuwasaidia kumwondoa madarakani Mwenyekiti huyo, kutokana na kitendo hicho cha kuwabeba watu wanaotuhumiwa kuweka sumu aina ya Round up ambayo inatumiwa kuulia magugu shambani.

Tukio hilo hivi sasa limesababisha kwenye chanzo hicho cha maji kijijini Matetereka, kaya zaidi ya 50 kukosa huduma ya maji safi na salama, kutokana na kuhofia endapo wakiendelea kuyatumia maji hayo huenda wakaathirika afya zao.

Licha ya tuhuma hiyo kuendelea kumtafuna Mwenyekiti huyo, pia analalamikiwa kwamba yeye pamoja na kamati yake ya maji wanadaiwa kula fedha za mchango ujenzi wa mradi wa maji shilingi milioni 21, ambazo zilichangwa na wananchi pamoja na wadau mbalimbali.

Njafula ananyoshewa kidole kwa kutosoma mapato na matumizi ya kijiji kwa muda mrefu sasa na kutumia madaraka yake vibaya, kwa kuwagawia vipande vya ardhi baadhi ya marafiki zake kijijini humo bila kufuata taratibu.

MVUTANO HUU WA STENDI NI AIBU KWA VIONGOZI WA SERIKALI SONGEA

Na Kassian Nyandindi,           

Songea.

MVUTANO uliodumu kwa muda mrefu baina ya Wadau wa usafirishaji abiria pamoja na baadhi ya viongozi wa kisiasa na serikali ya mkoa wa Ruvuma, ambao ulihusisha matumizi ya vituo viwili vikubwa vya mabasi ya abiria mjini Songea umeelezwa kumalizika, baada ya kufanyika mazungumzo na kuwepo kwa makubaliabo ya pamoja kwa pande zote husika.

Akizungumza kwenye mkutano uliofanyika katika Kituo cha mabasi mjini hapa,  ambao ulishirikisha baadhi ya Wadau hao, abiria na wananchi, Mstahiki  Meya wa Manispaa ya Songea Abdul Mshaweji pamoja na Mbunge wa jimbo la Songea mjini, Leonidas Gama alisema kwamba baada ya mazungumzo yaliyochukua muda mrefu na kuibuka kwa msuguano juu ya matumizi ya vituo vikubwa viwili, yamemalizika kwa makubaliano yaliyoridhiwa na viongozi watano wa ngazi za juu katika mkoa na halmashauri hiyo ya Manispaa.

Mshaweji alisema kuwa vikao hivyo vilimhusisha Mkuu wa mkoa wa Ruvuma, Dkt. Binilith Mahenge, Katibu tawala wa mkoa huo Hassan Bendeyeko, Mkurugenzi mtendaji wa halmashauri ya Manispaa ya Songea Tina Sekambo, Mstahiki Meya wa Manispaa hiyo, Abdul Mshaweji na Mbunge wa jimbo la Songea mjini Leonidas Gama ambapo pamoja wamekubaliana kuwa vituo vyote viwili vya mabasi ya abiria vitumike ambavyo ni kile kituo kilichopo mjini kati na cha Msamala.

MANISPAA SONGEA YALALAMIKIWA KWA KUSHINDWA KUTENGA MAENEO YA MAEGESHO VYOMBO VYA USAFIRI

Ofisi za Halmashauri Manispaa ya Songea mkoani Ruvuma.

Na Muhidin Amri,              

Songea.

HALMASHAURI ya Manispaa ya Songea mkoani Ruvuma, imelalamikiwa kwa kushindwa kwake kutenga maeneo rasmi ya maegesho ya magari hususani Malori na pikipiki, kitendo ambacho hivi sasa kinasababisha msongamano mkubwa wa vyombo hivyo vya moto kwa watu wanaotembea kwa miguu.

Pikipiki maarufu kama Yeboyebo, bajaji na magari ya mizigo yamekuwa yakipaki hovyo bila kufuata utaratibu maalumu katika maeneo mbalimbali ya Manispaa hiyo kama vile eneo maarufu la Ikweta, ambalo kuna makazi ya watu na nyumba za ibada.

Wakizungumza na gazeti hili  jana, baadhi ya wakazi hao walisema kuwa hali hiyo inawasababishia usumbufu mkubwa wakati wanapohitaji huduma ya usafiri kwani hakuna maeneo rafiki ambayo Manispaa hiyo imetenga kwa ajili ya kupata huduma ya usafiri kama vile boda boda, bajaji na malori.

DC MBINGA AWATAKA VIONGOZI KUONGEZA UWAJIBIKAJI KATIKA KAZI

Na Muhidin Amri,          

Mbinga.

MKUU wa wilaya ya Mbinga mkoani Ruvuma, Cosmas Nshenye amewataka viongozi wa vijiji na kata wilayani humo kuongeza uwajibikaji kwa wananchi, hatua ambayo itasaidia kupata ushiriki mkubwa wa wananchi katika shughuli za maendeleo.

Cosmas Nshenye, Mkuu wa wilaya ya Mbinga.

Nshenye alisema hayo juzi Ofisini kwake, alipokuwa akizungumza na mwandishi wa gazeti hili na kubainisha kuwa kuna haja sasa kwa watendaji hao wa serikali kuona umuhimu wa kujituma ipasavyo, katika kuwatumikia wananchi ambao bado wanakabiliwa na matatizo mengi ya kimaisha katika maeneo yao.

Pia Mkuu huyo wa wilaya ya Mbinga, amewataka watumishi wote wa umma kutokuwa chanzo cha matatizo na vurugu kwa wananchi kwani huu ni muda wa kufanya shughuli za maendeleo na kujiepusha vitendo viovu  kama vile ulaji wa fedha za maendeleo zinazopelekwa katika vijiji, kwa ajili ya utekelezaji wa miradi ya maendeleo na kuimarisha huduma za kijamii.

VALENCE: WADAU MBINGA JITOKEZENI KUNUNUA TOFARI ZILIZOCHANGANYWA KWA MCHANGA NA SIMENTI

Vijana wakifanya kazi katika kiwanda cha kuzalisha tofari zilizochanganywa kwa simenti na mchanga ambacho kinaendeshwa na Kampuni ya Ovans Construction Limited, Mbinga mjini mkoani Ruvuma.

Na Kassian Nyandindi,            

Mbinga.

HATIMAYE Kampuni ya Ovans Construction Limited iliyopo Mbinga mjini mkoani Ruvuma, imeanza kuzalisha tofari za kuchanganya mchanga na simenti kwa ajili ya ujenzi wa nyumba za aina mbalimbali, ikiwa ni lengo la kuwataka vijana wanaojishughulisha na kazi ya ufyatuaji tofari za udongo mabondeni katika mji huo waachane na kazi hiyo ambayo inachangia kwa kiasi kikubwa uharibifu wa mazingira.

Aidha uhamasishaji huo wa vijana kuachana na kazi ya ufyatuaji wa tofari za udongo mabondeni ni njia ya kuepukana pia na uharibifu wa vyanzo vya maji ambao unaendelea kushika kasi kila siku katika mji huo.

Mkurugenzi wa Kampuni hiyo, Valence Urio alisema hayo juzi alipokuwa akizungumza na waandishi wa habari mjini hapa ambapo alifafanua kuwa kazi hiyo ya uundaji wa tofari za udongo pia huchangia kwa kiasi kikubwa uharibifu wa misitu, ambapo wafyatuaji hulazimika kukata miti msituni kwa ajili ya kuweza kupata kuni za kuchomea tofari.

MANISPAA SONGEA YAPOKEA FEDHA ZA UTEKELEZAJI PROGRAMU YA UBORESHAJI MIJI NA MANISPAA

Manispaa ya Songea mkoani Ruvuma.

Na Muhidin Amri,            

Songea.

HALMASHAURI ya Manispaa ya Songea mkoani Ruvuma imepokea zaidi ya shilingi bilioni 7.54 kwa ajili ya kutekeleza programu ya uboreshaji wa Miji na Manispaa (ULGSP).

Ofisa habari wa Manispaa hiyo, Albano Midelo alisema kuwa fedha hizo ambazo zimepokelewa na Manispaa hiyo zimetoka hazina kwa mwaka wa fedha 2015/2016 na kwamba zimeletwa kwa awamu mbili.

Midelo alisema kuwa fedha zilizoletwa kwa awamu ya kwanza zilipokelewa mwezi Mei mwaka huu, kiasi cha shilingi bilioni 2.72 na awamu ya pili zilipokelewa Oktoba 6 mwaka huu kiasi cha shilingi bilioni 4.82.

WANANCHI RUVUMA WALALAMIKIA WABUNGE WAO

Na Julius Konala,       

Songea.

BAADHI ya wananchi wa mkoa wa Ruvuma wamewalalamikia Wabunge wa mkoa huo, kwa kushindwa kuwa na umoja katika kupigania suala la shirika la ndege za serikali (ATC) kutua kwenye uwanja wa Manispaa ya Songea mkoani humo, wakidai kuwa ni muda mrefu sasa umepita mkoa huo umesahaulika katika masuala ya usafiri wa anga.

Hayo yalisemwa kwa nyakati tofauti na wananchi hao walipokuwa wakizungumza na mwandishi wa habari hizi mjini Songea, ambapo wamedai kuwa wanashindwa kusafiri mara kwa mara kwa ndege ya Kampuni ya mtu binafsi inayofanya safari zake jijini Dar es salaam hadi Songea kutokana na gharama zake kuwa kubwa.

Mmoja wa wakazi wa Manispaa hiyo, Mohamed Abdallah alisema kuwa wananchi wa mkoa huo wamekuwa wakipata usumbufu mkubwa wa kusafiri kwa basi hadi mkoa wa Mbeya, kwa ajili ya kufuata huduma ya usafiri wa anga wakati usafiri huo endapo ungefanya safari zake mkoani humo na kwa bei ndogo ungesaidia kwa kiasi kikubwa hata kuleta wawekezaji na watalii watakaotembelea fukwe za ziwa Nyasa na wananchi kusafiri kwa ndege hizo.

WANANCHI KATA YA MKUMBI WAMLALAMIKIA DIWANI WAO WAUTAKA UONGOZI WA WILAYA KUINGILIA KATI KUMALIZA MGOGORO ULIOPO

Baadhi ya wananchi wa kata ya Mkumbi wilayani Mbinga mkoa wa Ruvuma, wakionesha kwa Waandishi wa habari jana (hawapo pichani) nyumba inayoendelea kujengwa na diwani wa kata ya Mkumbi Thomas Kapinga ambayo inadaiwa ipo ndani ya eneo lililotengwa kwa ajili ya upanuzi wa Kituo cha afya cha kata ya Mkumbi.

Wananchi wa kata ya Mkumbi wakiwa na vifaa mbalimbali kama vile magongo na matofali wakitaka kuvunja nyumba ya diwani wa kata hiyo, Thomas Kapinga kwa kile walichoeleza kuwa nyumba hiyo imejengwa katika eneo la zahanati ya kijiji cha Mkumbi ambayo inatumiwa na wananchi wote wa kata hiyo kwa ajili ya kupata huduma mbalimbali za matibabu, hata hivyo diwani huyo amekataa kusimamisha ujenzi kwa madai kwamba eneo hilo ni la kwake. (Picha zote na Muhidin Amri)

Na Kassian Nyandindi,            

Mbinga.

BAADHI ya Wananchi wa kata ya Mkumbi wilaya ya Mbinga mkoani Ruvuma, wamesema kwamba hawana imani na diwani wao wa kata hiyo, Thomas Kapinga kutokana na diwani huyo kudaiwa kuvamia eneo la kituo cha afya cha kata hiyo na kufanya shughuli za ujenzi wa nyumba yake binafsi.

Aidha walisema kuwa diwani huyo anafahamu kuwa eneo hilo lilitolewa na Wazee wa kata hiyo tokea miaka 1970 kwa ajili ya kuendeleza ujenzi wa kituo cha afya ikiwemo nyumba za kuishi watumishi, lakini wanamshangaa leo ameibuka na kudai kuwa ni la kwake na kuanza kufanya shughuli hizo za ujenzi.

Hayo yalisemwa na wananchi hao kwa nyakati tofauti walipokuwa wakizungumza na waandishi wa habari, ambao walitembelea katika kata hiyo kujionea maendeleo ya kituo cha afya kata ya Mkumbi.

Kufuatia hali hiyo wananchi hao wameutaka uongozi wa wilaya hiyo kuingilia kati na kuona namna ya kumaliza mgogoro huo, ambao sasa umedumu kwa muda mrefu bila kutafutiwa ufumbuzi wa kudumu.

KAMPUNI YA LEOP AND VIANN MKOMBOZI KWA MKULIMA WA MAHINDI MKOANI RUVUMA

Msimamizi wa ujenzi wa kiwanda cha kusindika nafaka cha Leop and Viann Associates Tanzania Limited, Zeno Komba akitoa maelekezo namna ambavyo mtambo wa kusindika mahindi unavyofanya kazi.

Hapa Zeno Komba akitoa maelekezo juu ya namna ambavyo kipimo cha kielektroniki kinavyofanya kazi wakati wa upimaji mahindi kiwandani hapo.

Na Dustan Ndunguru,

SERIKALI inayoongozwa na Rais Dkt. John Magufuli imekuwa ikiendelea na jitihada zake za kuhamasisha Watanzania wazalendo, kujenga dhana ya kuwekeza katika ujenzi wa viwanda vidogo, vya kati na vikubwa hapa nchini hali ambayo itaifanya Tanzania kuwa nchi ya uchumi wa kati ifikapo mwaka 2025.

Ukiachilia mbali Wazalendo, pia inaendelea kuhamasisha wawekezaji kutoka nje ya nchi waweze kuja kuwekeza kwa kujenga viwanda hivyo ambapo katika kufanikisha hilo, serikali inaowajibu wa kuandaa mazingira mazuri ambayo hayatakuwa kikwazo katika kufanikisha zoezi hilo muhimu la uwekezaji.

Watanzania waliowengi wanayo mitaji midogo ambayo kimsingi wanaweza kujikita zaidi katika uanzishaji wa viwanda vidogo nchini kote, ikiwemo maeneo ya vijijini ambako wakulima wamekuwa wakizalisha mazao mbalimbali huku yakishindwa kupata bei nzuri kutokana na kukosa uwezo wa kuyasindika na hivyo kuyaongezea thamani.

Viwanda vidogo ndiyo vyenye uwezo wa kutoa ajira kwa watu wa kada ya chini kwa wingi, ikilinganishwa na viwanda vikubwa ambavyo sehemu kubwa ya kazi zake hufanywa na mitambo hivyo kama mwitikio utakuwa mkubwa itasaidia kuondoa changamoto ya ukosefu wa ajira, tatizo ambalo limekuwa likiwakumba hasa vijana.

Mkoa wa Ruvuma ni moja kati ya mikoa ambayo imebahatika kuwa na ardhi nzuri ambayo wananchi wake wamekuwa wakiitumia kwa kuzalisha mazao mbalimbali ya chakula na biashara, huku changamoto kubwa ikiwa ni kukosekana kwa viwanda vya usindikaji jambo ambalo limekuwa kikwazo kikubwa kwa maendeleo yao.

Kutokana na serikali ya awamu ya tano kuhamasisha wananchi wajitokeze kuanzisha viwanda vidogo na vikubwa, baadhi ya wananchi wameanza kuitikia mwito huo kwa kasi kubwa ambapo wameweza kujitokeza na kuanzisha viwanda vidogo vya kusindika nafaka mkoani hapa na hivyo kupelekea wakulima wapate unafuu kwa njia moja au nyingine, ikiwemo urahisi wa kuuza mazao yao.

Hivi karibuni Mwandishi wetu wa makala haya alipata fursa ya kutembelea katika mtaa wa Namiholo ambao unajumuisha vitongoji vya Mtakuja, Kambarage, Soweto, Kisiwani, Miembeni na Mshikamano kijiji cha Peramiho A kata ya Peramiho, wilayani Songea ambako Kampuni ya Leop and Viann Associates Tanzania Limited imewekeza kwa kujenga kiwanda kidogo cha kusindika nafaka aina ya mahindi, jambo ambalo ni faraja kwa wakulima wa maeneo hayo jirani na mkoa wa Ruvuma kwa ujumla.

Mwenyekiti wa kijiji hicho David Kapinga anasema kwamba, kuanzishwa kwa kiwanda hicho kutasaidia kuinua uchumi wa wananchi wa Peramiho A, kutokana na kuwawezesha kuuza mazao yao karibu ambapo kitendo cha mwekezaji huyo kuanza kununua mahindi kwa ajili ya kiwanda hicho, pia ni mkombozi mkubwa kwa wakulima wake.

Kapinga anasema kuwa serikali kupitia Wakala wa Hifadhi ya Chakula Taifa (NFRA) Kanda ya Songea mkoani hapa mwaka huu imenunua tani 750 kidogo za mahindi kwa kata tatu za Peramiho A, Maposeni na Parango hivyo kupelekea wakulima waliowengi kubaki na mahindi yao majumbani.

“Kwa niaba ya wananchi wangu ninamshukuru mwekezaji huyu kwa kitendo chake cha kununua mahindi kutoka kwa wakulima tena kwa bei ya shilingi 460 ni msaada mkubwa kwetu, kwani walanguzi wamekuwa wakipita vijijini kununua kwa bei ndogo ya shilingi 300 hadi 350”, anasema Kapinga.

Mkurugenzi wa Kampuni ya Leop and Viann Associates Tanzania Limited, Viann Komba ambaye amejenga kiwanda cha kusindika nafaka za mahindi katika kijiji cha Peramiho A wilaya ya Songea vijijini, mkoa wa Ruvuma na kuwafanya wakulima wanaozalisha zao hilo kupata unafuu wa kuuza jirani mahindi yao kwa bei nzuri.

Anaishauri serikali kuwa na mkakati kabambe wa kuhamasisha wale wenye uwezo kufikiria kuanzisha viwanda katika maeneo ya vijijini ambako nako kuna fursa nyingi za kiuchumi, ifanye hivyo ili kuweza kusaidia kuwainua wakulima ambao kwa miaka mingi wamekuwa wakitumia nguvu nyingi kuzalisha mazao mbalimbali huku wakishindwa kunufaika nayo kutokana na kukosa kwa kwenda kuyauza.

Mkulima Joseph Nyoni anapongeza kitendo cha mwekezaji wa kiwanda hicho kidogo cha kusindika nafaka kununua mahindi yao kwa kutumia kipimo cha elektroniki, ikilinganishwa na wanunuzi waliowengi ambao wamekuwa wakitumia vipimo ambavyo hulenga kumwibia mkulima kwani huvichezea kila wakati tofauti na hicho cha kisasa ambacho ni vigumu kumwibia mkulima.

ASKOFU NDIMBO AWATAKA WASOMI KUACHA KUBEZA JUHUDI ZINAZOFANYWA NA SERIKALI YA AWAMU YA TANO

Wanafunzi wa kidato cha nne shule ya Sekondari Augustivo wilaya ya Mbinga mkoani Ruvuma, wakiwa katika maandamano kuelekea ukumbini shuleni hapo jana wakati wa mahafali yao ya tano ya kidato cha nne.

Wanafunzi wa kidato cha nne katika shule ya sekondari Agustivo iliyopo wilayani Mbinga mkoa wa Ruvuma, wakiimba wimbo wa shule yao wakati wa mahafali ya tano ya kidato cha nne katika shule hiyo.

Na Muhidin Amri,       

Mbinga.

WASOMI hapa nchini wametakiwa kutumia elimu yao katika kutafuta majawabu sahihi yatakayoiondoa Tanzania na tatizo la umaskini, kama anavyofanya Rais Dkt. John Magufuli badala ya kuwa mstari wa mbele kubeza na kukosoa juhudi hizo kubwa zinazofanywa na serikali ya awamu ya tano.

Aidha imeelezwa kwamba, tabia hiyo ni fedheha kwao na haina tija kwa Watanzania wenzao kwani elimu waliyoipata, wametumia fedha za walipa kodi wa nchi hii kupata mikopo iliyowafanya waweze kutumiza malengo na ndoto zao.

Vilevile wamekumbushwa kutimiza wajibu wao na kujiepusha na tabia ya kuwakatisha tamaa baadhi ya wasomi wengine, ambao wapo tayari kutumia elimu na maarifa waliyonayo kwa faida ya Watanzania wenzao ambao bado wanakabiliwa na matatizo mengi, ikiwemo upungufu wa huduma muhimu za kijamii katika maeneo mbalimbali.

MBINGA YAPIGA HATUA KATIKA KUPUNGUZA VIFO VYA AKINAMAMA WAJAWAZITO

Baadhi ya akinamama wajawazito wakiwa katika eneo la hospitali ya wilaya ya Mbinga.

Na Kassian Nyandindi,         

Mbinga.

HALMASHAURI ya wilaya ya Mbinga mkoani Ruvuma, imepiga hatua katika kupunguza vifo vya akima mama wajawazito na watoto chini ya umri wa miaka mitano kutoka vifo 140 kati ya 100,000 kwa mwaka 2013 hadi kufikia vifo 40 mwaka 2015 hatua ambayo imeleta matumaini makubwa, kwa akina mama hao na jamii kwa ujumla wilayani humo.

Mafaniko hayo yametokana na mkakati kabambe wa halmashauri hiyo kwa kushirikiana na wadau wengine wa maendeleo ndani na nje ya wilaya hiyo ambao wamejiwekea, katika kuimarisha mfumo wa rufaa kwa akina mama wajawazito na kuwapatia elimu ya matunzo kwa wajawazito hao kuhusu umuhimu wa kuhudhuria Kliniki mapema na wakati wote wa ujauzito wao na mara baada ya kujifungua.

Pia elimu ya kujifungulia katika vituo vya afya na hospitali nao umesaidia kwa kiasi kikubwa kupunguza vifo kwa akina mama hao pamoja na watoto wao, kwani pale wanapohitaji kutoka katika ngazi ya zahanati au kituo cha afya huchukuliwa kwa gari maalumu la kubebea wagonjwa bila malipo yoyote, tofauti na siku za nyuma walikuwa wakilazimika kuchangia kidogo.

MBINGA WAANZA KUTEKELEZA ZOEZI LA UPIMAJI ARDHI

Na Kassian Nyandindi,           

Mbinga.

HALMASHAURI ya wilaya ya Mbinga mkoani Ruvuma, imeanza kutekeleza mpango wake wa zoezi la upimaji ardhi katika maeneo ambayo yana rasilimali muhimu za kudumu kama vile mashamba ya kahawa na miti, ili kuweza kuyaongezea thamani na kuwafanya wakulima waweze kupata mikopo katika taasisi za kifedha na hatimaye waweze kuondokana na umaskini.

Aidha imeelezwa kuwa mpango huo unalenga kupima ekari zaidi ya 68,000 na kwamba mpaka sasa tangu zoezi hilo lianze tayari ekari 12,600 zimepimwa na kwamba kazi hiyo imefanyika katika kipindi cha wiki moja.

Hayo yalisemwa na Mkurugenzi mtendaji wa halmashauri ya wilaya hiyo, Gombo Samandito alipokuwa akihojiwa na waandishi wa habari ambao walitembelea katika baadhi ya vijiji, ambavyo zoezi hilo la upimaji linaendelea kufanyika.

KATIBU TAWALA MBINGA ASISITIZA UUNDAJI WA MABARAZA YA WATU WENYE ULEMAVU

Baadhi ya Watu wenye ulemavu wakiwa katika picha ya pamoja na Katibu tawala wa wilaya ya Mbinga mkoani Ruvuma, Gilbert Simiya ambaye amevaa shati la kitenge, mara baada ya kufanya uzinduzi wa mradi wa mafunzo ya sheria ya watu wenye ulemavu. (Picha na Muhidin Amri)

Na Kassian Nyandindi,          

Mbinga.

MAOFISA maendeleo ya jamii katika Halmashauri ya wilaya na mji wa Mbinga mkoani Ruvuma, wametakiwa kuhakikisha kwamba wanasimamia ipasavyo zoezi la uundwaji wa mabaraza ya watu wenye ulemavu katika ngazi ya halmashauri, kata na vijiji.

Agizo hilo lilitolewa na Katibu tawala wa wilaya ya Mbinga, Gilbert Simiya alipokuwa kwenye hafla fupi ya uzinduzi wa mradi wa mafunzo ya sheria namba 9 ya watu wenye ulemavu ya mwaka 2010, uliofanyika kwenye ukumbi wa Chama Cha Mapinduzi (CCM) mjini hapa.

“Natoa agizo kwenu, uundwaji wa mabaraza haya ni suala la lazima tekelezeni hili mapema na kwa wakati uliopangwa, ili serikali iweze kufikia malengo yake katika makundi yote ya watu wenye ulemavu”, alisisitiza.

Simiya aliongeza kuwa utekelezaji wa zoezi hilo ni agizo lililotolewa na Waziri Mkuu, Kassim Majaliwa hivyo muda wowote serikali itakuja kufanya ufuatiliaji juu ya utekelezaji wake.

Alisisitiza kuwa  utekelezaji wa jambo hilo lisiwe kwa mtindo wa kupika anataka kuona linafuata misingi na taratibu zilizowekwa, ili kuweza kuwatendea haki walemavu wa wilaya hiyo na kwamba malengo ya uundwaji wa mabaraza hayo ni kutaka kuwatambua walemavu na shughuli zao wanazozifanya.

TFS MBINGA YATOA MSAADA WA MADAWATI KWA SHULE ZA MSINGI

Katibu tawala wilaya ya Mbinga, Gilbert Simiya wa pili kutoka kushoto akikata utepe ikiwa ni ishara ya tendo la kukabidhi madawati yaliyofadhiliwa na Wakala wa Huduma za Misitu Tanzania (TFS) wilayani hapa. (Picha na Muhidin Amri) 

Na Kassian Nyandindi,           

Mbinga.

WADAU wa elimu wilayani Mbinga mkoa wa Ruvuma, wameshauriwa kuendelea kuchangia katika sekta ya elimu wilayani humo ili watoto wanapokuwa shuleni waweze kusoma wakiwa katika mazingira mazuri na kufanya vyema katika masomo yao.

Aidha taasisi mbalimbali nazo zimetakiwa kuhamasika kuchangia madawati shuleni na sio kuiachia serikali peke yake, kwani sekta ya elimu ili iweze kusonga mbele inahitaji mchango kutoka kwa wadau mbalimbali.

Katibu tawala wa wilaya ya Mbinga Gilbert Simiya alisema hayo juzi mjini hapa alipokuwa katika zoezi la kukabidhi madawati 80 kwa uongozi wa halmashauri ya wilaya hiyo, ambayo yalitolewa na Wakala wa Huduma za Misitu Tanzania (TFS) ikiwa ni mchango wa madawati hayo uliotolewa kwa ajili ya matumizi ya watoto wa shule za msingi wilayani hapa.

Simiya alikuwa akimwakilisha Mkuu wa wilaya hiyo, Cosmas Nshenye ambapo alitoa pongezi kwa Wakala huyo kwa kuunga mkono juhudi za Rais John Magufuli kutoa mchango huo wa madawati ili kusaidia kuboresha sekta hiyo ya elimu.

MBINGA WAKUMBUKA MCHANGO WA ALIYEKUWA AFISA ELIMU MSINGI MATHIAS MKALI

Afisa elimu msingi halmashauri ya wilaya ya Mbinga mkoani Ruvuma, Samwel Komba akizungumza mwishoni mwa wiki wakati wa sherehe ya kumuaga aliyekuwa afisa elimu ya msingi wa wilaya hiyo, Mathias Mkali wa pili kutoka kulia ambaye amehamishiwa mkoa wa Rukwa kuwa afisa elimu taaluma wa mkoa huo. Kushoto ni mgeni rasmi katika sherehe hiyo ambaye ni Meneja wa Kiwanda cha kukoboa kahawa Mbinga, Jonas Mbunda.

Afisa elimu taaluma wa mkoa wa Rukwa, Mathias Mkali kulia akimwonesha  Meneja wa Kiwanda cha kukoboa kahawa Mbinga, Menas Mbunda ambaye alikuwa mgeni rasmi wa sherehe ya kuagwa kwake tuzo maalum iliyotolewa na Rais wa awamu ya nne Dkt. Jakaya Kikwete ya kuipongeza wilaya ya Mbinga kutokana na matokea mazuri katika mitihani ya kumaliza elimu ya msingi darasa la saba kwa miaka miwili 2013/2014 ambapo wilaya hiyo, ilifanya vizuri katika matumizi ya fedha zilizotolewa na serikali kwa ajili ya elimu na kushika nafasi ya kwanza katika mkoa wa Ruvuma.

Afisa elimu taaluma wa mkoa wa Rukwa Mathias Mkali ambaye alikuwa afisa elimu ya msingi katika wilaya ya Mbinga mkoani Ruvuma, akizungumza mwishoni mwa wiki wakati wa sherehe ya kumuaga iliyoandaliwa na Wadau mbalimbali wa elimu wilayani humo.

Mgeni rasmi katika sherehe ya kumuaga aliyekuwa Afisa elimu msingi wilaya ya Mbinga ambaye kwa sasa ni Afisa taaluma mkoa wa Rukwa Mathias Mkali, Jonas Mbunda kushoto, akimuongoza Mkali upande wa kulia kukata keki maalum iliyoandaliwa na wadau wa elimu wa wilaya hiyo kutokana na kufurahishwa na mchango mkubwa alioutoa katika suala zima la maendeleo ya elimu wilayani humo.

Baadhi ya wanakamati wa sherehe hiyo wakiwa katika furaha wakati wa zoezi la kutoa zawadi kwa muagwa.

Baadhi ya wageni waalikwa waliohudhuria sherehe fupi ya kumuaga aliyekuwa Afisa elimu msingi wilaya ya Mbinga mkoani Ruvuma, Mathias Mkali wakifuatilia matukio katika sherehe hiyo iliyofanyika mwishoni mwa wiki katika ukumbi wa Uvikambi Mbinga mjini.

RC RUVUMA AKEMEA KITENDO CHA WATUMISHI WA SERIKALI MBINGA KUFANYABIASHARA YA MAGOMA YA KAHAWA

Na Kassian Nyandindi,             

Mbinga.

BAADHI ya Watumishi wa serikali waliopo katika halmashauri ya wilaya ya Mbinga mkoani Ruvuma, wamelalamikiwa wakidaiwa kutumia muda mwingi kufanya biashara haramu ya magoma ya kahawa licha ya serikali kukemea vitendo hivyo kwa muda mrefu ikiwataka waache mara moja.

Aidha wamenyoshewa kidole kwamba kwa kuwa ndiyo wamekuwa vinara namba moja kufanya biashara hiyo kwa lengo la kumdhulumu mkulima anayezalisha zao hilo, kwa atakayekamatwa atapewa adhabu kali ikiwemo kufikishwa mahakamani ili iweze kuwa fundisho kwa wengine wenye tabia kama hiyo.

Mkuu wa wilaya ya Mbinga, Cosmas Nshenye alimweleza hayo Mkuu wa mkoa huo Dkt. Binilith Mahenge wakati alipokuwa amewasili wilayani hapa katika ziara yake ya kikazi ya kutembelea miradi mbalimbali ya maendeleo wilayani humo.

SEKONDARI YA WASICHANA MBINGA WAKABILIWA NA UPUNGUFU WA MABWENI YA KULALA WANAFUNZI

Na Kassian Nyandindi,             

Mbinga.

IMEELEZWA kuwa tatizo la kulala wanafunzi wawili kitanda kimoja katika bweni la shule ya Sekondari wasichana Mbinga iliyopo mkoani Ruvuma, inatokana na upungufu mkubwa uliopo wa majengo na vyumba vya kulala watoto hao katika shule hiyo, hivyo kuna kila sababu kwa serikali kuchukua hatua za haraka ili kuweza kunusuru hali hiyo.

Kufuatia hali hiyo Mkuu wa mkoa wa Ruvuma, Dkt. Binilith Mahenge ameuagiza uongozi wa wilaya hiyo kuhakikisha kwamba unatenga fedha kupitia vyanzo vyake vya mapato ya ndani, kwa ajili ya kuweza kuanza taratibu za ujenzi wa bweni hilo la kulala watoto hao ili waweze kuondokana na adha hiyo wanayoipata sasa.

Dkt. Mahenge alitoa agizo hilo hivi karibuni alipokuwa katika ziara yake ya kikazi wilayani Mbinga mkoani hapa, kukagua maendeleo ya shule za sekondari kwa lengo pia la kujionea changamoto mbalimbali zilizopo kwenye shule hizo na kuzitafutia ufumbuzi wake.

BENKI YA NMB TAWI LA LITEMBO MBINGA YAMWAGA MISAADA HOSPITALI YA MISHENI LITEMBO

 Kaimu Mganga mkuu hospitali ya Misheni Litembo inayomilikiwa na Kanisa Katoliki jimbo la  Mbinga mkoani Ruvuma, Dkt. Maurus Ndomba upande wa kushoto, akipokea sehemu ya shuka 46 kutoka kwa Meneja wa benki ya NMB tawi la Litembo Kennedy Chinguile, ili zisaidie wagonjwa katika hospitali hiyo, katikati ni katibu wa afya wa hospitali hiyo, Anna Mwenda.

 Katibu wa hospitali ya Misheni Litembo, Anna Mwenda upande wa kulia akizungumza  jambo kabla ya kupokea msaada wa shuka 46 kutoka kwa uongozi wa benki ya NMB tawi la Litembo wilayani Mbinga mkoani hapa, wa pili upande wa kulia ni Meneja wa NMB tawi la Litembo, Kennedy Chinguile na wa tatu ni Kaimu Mganga mkuu wa hospitali hiyo, Dkt. Maurus Ndomba.

 Katibu wa hospitali ya Misheni Litembo wilayani Mbinga, Anna Mwenda upande wa kulia akimshukuru mmoja kati ya wafanyakazi wa benki ya NMB tawi la Litembo mara baada ya kupokea msaada wa shuka 46 kwa ajili ya matumizi katika hospitali hiyo.

 Baadhi ya wafanyakazi wa benki ya NMB tawi la Litembo wilayani Mbinga wakitoa misaada mbalimbali kwa wagonjwa waliolazwa katika hospitali ya Misheni Litembo wilayani humo.

 Mmoja kati ya wagonjwa aliyelazwa katika hospitali ya Misheni Litembo wilayani Mbinga mkoa wa Ruvuma, Folkwati Komba(4) akimsalimia kwa mkono wake mfanyakazi wa benki ya NMB ambaye hakufahamika jina lake mara moja, baada ya benki hiyo kutoa msaada wa mashuka na vitu mbalimbali.

 Wafanyakazi wa NMB tawi la Litembo, wakitoa msaada kwa mgonjwa aliyelazwa katika hospitali ya Misheni Litembo wilayani Mbinga.

 Meneja wa benki ya NMB tawi la Litembo wilaya ya Mbinga, Kennedy Chinguile akitoa pole kwa mtoto Folkwati Komba aliyelazwa katika hospitali ya Misheni Litembo wilayani humo.

 Meneja wa benki ya NMB tawi la Litembo wilaya ya Mbinga, Kennedy Chinguile akimfariji mgonjwa aliyelazwa katika hospitali ya Misheni Litembo wilayani hapa.

Katibu wa hospitali ya Misheni Litembo wilayani Mbinga, Anna Mwenda upande wa kulia akitoa neno la shukrani kwa wafanyakazi wa benki ya NMB tawi la Litembo mara baada ya kupokea msaada wa shuka 46 kwa ajili ya matumizi ya wagonjwa wanaolazwa hospitalini hapo. (Picha zote na Muhidin Amri)

KTA YAWAJENGEA UWEZO WAANDISHI WA HABARI NA WAKUFUNZI WA VYUO VYA MAENDELEO YA WANANCHI

Waandishi wa habari wakikaribishwa katika mafunzo yanayolenga kuwajengea uwezo wa kufikisha habari katika jamii kwa haraka zaidi na kwamba, mafunzo hayo yanasimamiwa na Shirika la Karibu Tanzania Association (KTA).  

Na Kassian Nyandindi,           

Iringa.

WAANDISHI wa habari hapa nchini, wametakiwa kujijengea ujasiri na kuacha kukata tamaa pale wanapokumbwa na vikwazo wakati wanapofanya kazi zao, badala yake wazingatie maadili ya taaluma yao ili jamii iendelee kuwathamini na kuheshimu vyombo vya habari.

Aidha imeelezwa kuwa tasnia ya habari, ndiyo fani mtambuka inayoweza kuwafanya wananchi waweze kusonga mbele kimaendeleo kwa faida ya kizazi cha sasa na hapo baadaye.

Mwenyekiti wa taifa, Shirika la Karibu Tanzania Association (KTA) Aidan Mchawa alisema hayo leo alipokuwa akifunga mafunzo ya siku tatu ya Wanahabari na Wakufunzi wa Vyuo vya Maendeleo ya Wananchi (FDC) hapa nchini, yaliyofanyika kwenye ukumbi wa Neema Craft uliopo katika Manispaa ya Iringa mkoani hapa.

KIWANDA CHA KUKOBOA KAHAWA MBINGA CHAJIVUNIA MAFANIKIO YAKE

Kahawa iliyosindikwa yenye jina maarufu Mbinga Cafe ni sehemu ya bidhaa zinazozalishwa na Kiwanda cha kukoboa kahawa Mbinga.

Na Kassian Nyandindi,         

Mbinga.

IMEBAINISHWA kuwa uzalishaji mdogo wa kahawa ya maganda katika wilaya ya Mbinga mkoani Ruvuma na ongezeko la ushindani katika biashara ya ukoboaji wa kahawa ni changamoto kubwa inayokikabili Kiwanda cha Kukoboa Kahawa Mbinga (MCCCO) kwani kimekuwa kikipokea zao hilo kiasi kidogo tofauti na uwezo mkubwa ilionao wa kukoboa kahawa.

Pamoja na Kiwanda hicho kujengwa kuwa na uwezo mkubwa wa kukoboa kahawa zaidi ya tani 30,000 kwa mwaka, bado uzalishaji wa za hilo wilayani humo umekuwa ni mdogo kutoka kwa wakulima ambapo kwa mwaka wamekuwa wakizalisha tani 5,000 hadi 17,500 tu hali ambayo imekuwa ikisababisha kushindwa kufikia malengo husika.

Aidha kwa upande wa ushindani wa biashara ya ukoboaji kahawa umeongezeka kutokana na mji wa Mbinga peke yake hivi sasa, kuna viwanda vitatu vya kukoboa zao hilo hivyo kutokana na uzalishaji kuwa kidogo kutoka kwa mkulima, kahawa inayozalishwa imekuwa ni ya mtindo wa kunyang’anyana.

Hayo yalisemwa na Meneja Mkuu wa kiwanda cha kukoboa kahawa wilayani Mbinga, Jonas Mbunda alipokuwa akitoa taarifa fupi ya maendeleo ya kiwanda hicho kwa Mkuu wa mkoa wa Ruvuma, Dkt. Binilith Mahenge aliyetembelea juzi kujionea maendeleo mbalimbali kiwandani hapo.

DOKTA MAHENGE ASIKITISHWA NA ONGEZEKO LA MIMBA ZA WANAFUNZI WA KIKE MBINGA

Na Kassian Nyandindi,          

Mbinga.

MKUU wa mkoa wa Ruvuma, Dkt. Binilith Mahenge amesikitishwa na idadi ya ongezeko la mimba kwa watoto wa kike wanaosoma shule za sekondari wilayani Mbinga mkoani humo, jambo ambalo linasababisha washindwe kuendelea na masomo yao.

Dkt. Binilith Mahenge.

Jumla ya wanafunzi wa kike 37 wanaosoma katika shule za sekondari zilizopo katika maeneo mbalimbali wilayani humo wamepewa ujauzito na kesi zao zimefikishwa Polisi, ili watuhumiwa waliohusika na vitendo vya kukatisha masomo ya watoto hao waweze kuchukuliwa hatua za kisheria.

Dkt. Mahenge alipokea taarifa ya kesi hizo ambayo ilitolewa na Mkuu wa wilaya ya Mbinga Cosmas Nshenye juzi alipokuwa katika ziara yake ya kikazi wilayani hapa, ambapo Mkuu huyo wa wilaya alisema kuwa mimba hizo wamepewa katika kipindi cha kuanzia Januari hadi Septemba mwaka huu.

Kufuatia hali hiyo Mkuu huyo wa mkoa ameutaka uongozi wa wilaya hiyo kuhakikisha kwamba, suala hilo linatekelezwa kikamilifu kwa kuhakikisha watuhumiwa wote waliohusika kufanya vitendo hivyo wanachukuliwa hatua za kisheria ikiwemo kufikishwa mahakamani.

MANISPAA YA SONGEA KUWALETEA NEEMA WANANCHI WAKE KUPITIA MIRADI INAYOSIMAMIWA KWA USHIRIKIANO NA BENKI YA DUNIA

Na Kassian Nyandindi,        

Songea.

HALMASHAURI ya Manispaa ya Songea mkoani Ruvuma imepanga kutekeleza miradi nane iliyopo chini ya mradi wa uendelezaji miji na manispaa, katika kipindi cha mwaka wa fedha wa 2017/2018 kwa lengo la kuwaletea maendeleo wananchi wake kwa faida ya kizazi cha sasa na baadaye. 

Hii ni moja kati ya sehemu ya Manispaa ya Songea mkoani Ruvuma.

Kwa mujibu wa taarifa iliyotolewa na Ofisa habari wa Manispaa hiyo, Albano Midelo alisema kuwa Manispaa hiyo ni miongoni mwa halmashauri 18 hapa nchini ambazo zinatekeleza mradi huo ambao unasimamiwa na serikali ya Tanzania kwa ushirikiano na benki ya dunia.

Midelo alisema kuwa Manispaa ya Songea, inatarajia kutumia zaidi ya shilingi bilioni 21.8 katika kutekeleza miradi ya uendelezaji miji yake na manispaa hiyo ambayo itatekelezwa katika kipindi cha miaka mitatu.