Na
Kassian Nyandindi,
Nyasa.
SHULE ya msingi Ndingine iliyopo
katika kata ya Ngumbo wilayani Nyasa mkoa wa Ruvuma,
inakabiliwa na tatizo la ukosefu wa vyoo kwa muda mrefu sasa jambo ambalo lina
hatarisha usalama wa afya kwa walimu na watoto wanaosoma shuleni hapo.
Mwandishi wa habari hizi amebaini na
kushuhudia pia wanafunzi wakijisaidia pori
lililopo jirani na shule hiyo, huku walimu wao nao wakiomba msaada katika vyoo
vya wakazi wanaoishi jirani na shule hiyo.
Huenda hatua zisipochukuliwa mapema
hususani katika kipindi hiki cha masika magonjwa ya mlipuko kama
vile kipindupindu na homa zingine za matumbo, zinaweza kujitokeza na kuleta
madhara makubwa kwa binadamu.
Ndingine ni shule ambayo ina jumla ya
wanafunzi 306 wakiwemo wavulana 163 na wasichana 143 ambapo hata
mazingira ya shule hiyo sio mazuri hivyo jitihada za makusudi zinahitajika
katika kunusuru hali hiyo isiweze kuendelea.
Baadhi ya wakazi na walimu ambao
nimezungumza nao kwa nyakati tofauti kwa sharti la kutotaka majina yao yatajwe, walisema tatizo hilo linasababishwa na uzembe unaofanywa na uongozi
husika wa halmashauri ya wilaya ya Nyasa kutotembelea shule kwa muda mrefu na
kujionea hali halisi ya matatizo yaliyopo.
“Viongozi wa wilaya yetu idara ya
elimu hatuja waona hapa kutembelea shule hii, ni muda mrefu umepita na ndio
maana ndugu mwandishi unaona matatizo haya yakiendelea kuwepo”, walisema.
Ofisa elimu wa wilaya hiyo Robert
Hyera alipoulizwa kwa njia ya simu juu ya matatizo hayo alikiri na kusema kuwa
wakati wowote anatarajia kwenda huko kwa lengo la kujionea hali halisi na kuona
namna gani wanachukua hatua katika kumaliza matatizo ya shule hiyo.
“Taarifa ya matatizo ya shule hii
ninayo, hivi sasa nipo safarini nitakaporudi nitakwenda huko ili kuona
tunachukua hatua gani”, alisema Hyera.
Juu ya suala la idara yake
kutotembelea shule ya msingi Ndingine kwa muda mrefu, alisema yeye ni mgeni amehamia
hivi karibuni katika wilaya hiyo hivyo hawezi kujua huko nyuma hali ilikuwaje.
No comments:
Post a Comment