CUF YATAMBA, YASEMA CCM UMEFIKA WAKATI WA KUFUNGA VIRAGO

Na Steven Augustino,

Tunduru.

CHAMA Cha wananchi (CUF) Taifa kimetangaza sera ya kutoa gawiwo kwa wananchi wake, endapo kitapatiwa ridhaa ya kuongoza nchi katika uchaguzi mkuu ujao ikiwemo wananchi watanufaika na rasilimali za taifa, katika kipindi chake cha uongozi.

Aidha kitafungua akaunti maalumu tatu ambapo baadhi ya mapato yake  ndiyo yatakayokuwa yakigawiwa kwa wananchi hao.

Katibu Mkuu wa CUF makamu wa kwanza wa Rais Zanzibar, Maalim seif Sharifu alisema hayo alipokuwa akihutubia wananchi wa wilaya ya Tunduru mkoani Ruvuma, wakati wa ziara yake ya kikazi ya kuhamasisha wananchi kujiunga na chama hicho.

Maalimu Seif, alisema Chama Cha Mapinduzi (CCM) ni wakati wake sasa wa kufunga virago na kwenda zake, huku akieleza kuwa CUF kimejipanga kuchukua  vitongoji, vijiji na mitaa yote katika chaguzi zijazo na uchaguzi mkuu ambao unatarajiwa kufanyika Oktoba 2015 mwakani.

Alisema Watanzania wanazo rasilimali nyingi katika taifa hili, kama vile madini na gesi asilia hivyo hawana budi kunufaika navyo na sio kuendelea kuwa masikini hivyo CCM ambacho ndio chama tawala kinachoongoza serikali, kina wajibu wa kuhakikisha kwamba wananchi wake wanaboreshewa miundombinu husika ikiwemo barabara, maji na hata katika sekta ya elimu.

Awali akitoa maelezo kwa viongozi hao wa Mwenyekiti mwenza wa Umoja wa Katiba ya Wananchi wilayani Tunduru, ambaye pia ni mkurugenzi wa siasa na uenezi wa CUF wilayani humo Said Kiosa, alisema katika kuhakikisha kuwa wanaimwaga CCM,  Ukawa wamejipanga na kukubaliana kusimamisha mgombea mmoja mmoja kulingana na kila eneo analokubalika.

Pamoja na mambo mengine, Kiosa alifafanua kuwa makubaliano ya kufanya hivyo, yalifikiwa  Novemba 18 mwaka huu.