MKURUGENZI MBINGA AENDELEA KUKALIA KUTI KAVU, WADAU WASEMA UMEFIKA WAKATI KWA SERIKALI KUMCHUKULIA HATUA ZA KINIDHAMU

Na Kassian Nyandindi,

Mbinga.

BARUA iliyoandikwa na Mkurugenzi mtendaji wa Halmashauri ya wilaya ya Mbinga mkoani Ruvuma, Hussein Ngaga juu ya kuifutia usajili asasi ya Waratibu elimu kata wilayani humo (UWEKAMBI) kwa madai kwamba imeshindwa kutimiza masharti na taratibu husika, imezua gumzo huku wakisema kuwa mkurugenzi huyo, amekosa kazi ya kufanya badala yake ajikite katika kufikiria maendeleo ya wanambinga na sio kuendekeza migogoro ambayo haina tija katika jamii.

Barua hiyo yenye kumbukumbu namba MDCC/F.10/20/64 ya Novemba 30 mwaka huu ambayo imesainiwa na mkurugenzi huyo, ambapo waratibu hao walipozungumza kwa nyakati tofauti walisema kuwa kitendo hicho kilichofanywa na mkurugenzi huyo, si cha kiungwana bali ana mambo yake binafsi ambayo hawatakii mema wananchi wa wilaya hiyo.

Walisema UWEKAMBI ilianzishwa kwa nia njema na kwa kufuata taratibu husika za usajili kupitia ofisi yake ya idara ya maendeleo ya jamii, hivyo yeye anavyosema leo kwamba umoja huo unakiuka sheria, kanuni na taratibu zinazoongoza misingi ya utendaji kazi wa asasi za kiraia, sio kweli bali anachuki binafsi huku wakimtaka asitumie vibaya cheo chake alichonacho na kuingiza mambo binafsi katika utendaji kazi wa maendeleo ya wananchi.

Uchunguzi uliofanywa na mwandishi wa habari hizi umebaini kuwa, mkurugenzi Hussein Ngaga ameandika barua hiyo kufuatia mtandao wa mashirika yasiyokuwa ya kiserikali wilayani Mbinga (MBINGONET) kumpatia taarifa kupitia barua yenye kumbukumbu namba MBINGONET/MT/MK/068 kuwa, wanampango wa kutembelea asasi za kiraia na wadau wa elimu kwa baadhi ya kata za wilaya hiyo.

Kufuatia barua hiyo ndiyo iliyoleta uchokonozi na kumfanya mkurugenzi huyo kuandika barua hiyo, ya kuifutia usajili UWEKAMBI ambayo imekuwa ikishughulika na masuala ya kukuza kiwango cha taaluma wilayani humo kwa elimu ya msingi.

Barua hiyo ya kuifutia usajili asasi hiyo, inadaiwa kwamba ameiandika kwa tarehe hiyo ikionyesha kuwa ni ya siku nyingi, kumbe sivyo na kwamba kwa mujibu wa vyanzo vyetu vya habari vimesema kuwa imeandikwa siku chache zilizopita, ambapo hata Mwenyekiti wa umoja huo wa waratibu elimu kata wilayani hapa, Martha Lipa alipoulizwa alisema yeye hajapata barua yoyote inayotoka kwa mkurugenzi huyo juu ya kuifutia usajili asasi hiyo, bali amekuwa akisikia maneno mitaani kwamba kuna barua ambayo inasema hivyo.

Mwandishi wa habari hizi ambaye barua hiyo ameipata, yenye nakala kwenda kwa Katibu tawala wa mkoa wa Ruvuma, Mkuu wa wilaya ya Mbinga na Mtandao wa asasi za kiraia wilayani hapa (MBINGONET) inathibitisha kwamba mkurugenzi huyo, ameifutia usajili asasi hiyo ya waratibu elimu kata wa wilaya hiyo.

Moja kati ya vipengele vya barua hiyo vinasema kuwa “Hivyo basi, kwa barua hii na kwa mamlaka niliyonayo kisheria na baada ya kujiridhisha kwa uwepo wa udhaifu katika utendaji wa asasi hiyo ndani ya jamii kinyume na majukumu yaliyoanishwa hapo juu, natamka rasmi asasi ya UWEKAMBI yenye namba ya usajili 00CBO/0001 – 768 ambayo imekuwa ikiendeshwa kinyume cha marekebisho ya sheria ya usajili wa asasi Tanzania, sheria namba 11 (2005) kanuni na taratibu za usajili 2008 na 2013/2014 za halmashauri ya wilaya ya Mbinga. Hivyo cheti chake cha usajili ni batili na hakitambuliki ndani ya halmashauri ya wilaya ya Mbinga”.  

Kufuatia hali hiyo nimezungumza na wataalamu wa mambo ya ushirika kwa nyakati tofauti wilayani humo, wanasema kuwa tendo hilo la kuifutia usajili asasi hiyo kwa mtindo wa kuiandikia barua bila kukaa kikao na wadau husika wenye asasi ni ukiukaji wa taratibu na sheria za nchi, hivyo ni batili na mkurugenzi huyo ameshindwa kufuata taratibu husika ambapo dhahiri inaonesha kuwa ana nia mbaya na matakwa yake binafsi.

Walisema kama UWEKAMBI alibaini kuna matatizo ni vizuri angefuata taratibu kuanzia ngazi ya chini kwa kukaa na wahusika, hadi kufikia maamuzi hayo aliyoyafanya, lakini sio kuchukua hatua ya kukaa mezani na kufanya hayo aliyoyafanya.

“Hii asasi kama kweli ilisajiliwa kisheria maana yake taarifa husika za asasi, zipo hadi ngazi ya juu Taifa (RITA) hivyo alipaswa kujenga hoja zake za msingi za kuifutia kwa kukaa kwanza mezani na wahusika wa asasi, ndipo kama angebaini kuna tatizo angeweza kuchukua hatua aliyoifanya sasa lakini sio kufanya mambo kienyeji kama hivi, hiki alichokifanya amejipalia makaa ya moto yeye mwenyewe huko mbele suala hili litamletea tatizo”, walisema.

Waliongeza kuwa Hussein Ngaga tokea amefika katika wilaya ya Mbinga, ni mtu wa kupenda kutengeneza migogoro ya hapa na pale kila kukicha badala ya kufikiria kufanya maendeleo ya wananchi, hivyo ni wakati sasa kwa serikali kumchukulia hatua za kinidhamu ili iwe fundisho kwake, na watu wengine wenye tabia kama hiyo.