MAZISHI YA MWANAFUNZI AKWILINA KUFANYIKA IJUMAA NDUGU WAKUSANYIKA MUHIMBILI

Akwilina Akwiline.

HATIMAYE Mazishi ya mwili wa aliyekuwa Mwanafunzi wa Chuo cha Taifa cha Usafirishaji (NIT), Akwilina Akwiline yatafanyika siku ya Ijumaa Februari 23 mwaka huu Mkoani Kilimanjaro.

Moi Kiyeyeu akizungumza na mwandishi wetu alisema kwamba baada ya kikao cha familia, wamekubaliana kuwa Akwilina atazikwa Mkoani humo baada ya kuagwa Februari 22 mwaka huu katika viwanja vya chuo hicho Mabibo jijini Dar es Salaam.

Akwilina alifariki dunia Februari 16 mwaka huu baada ya kupigwa risasi akiwa kwenye daladala, wakati Polisi wakiwatawanya waandamanaji ambao ni wafuasi wa Chama Cha Demokrasia na Maendelea (CHADEMA).

“Tutamuaga ndugu yetu siku ya Alhamisi katika viwanja vya chuo cha NIT pale Mabibo na siku hiyo hiyo tutaanza safari kuelekea Rombo-Mashati Olele Mkoani Kilimanjaro na mazishi tutafanya Ijumaa”, alisema Kiyeyeu.

Ndugu wakusanyika Muhimbili

Kadhalika mwili wa mwanafunzi huyo umepelekwa Hospitali ya Taifa Muhimbili (MNH) leo Jumatatu Februari 19 mwaka huu asubuhi.

Mwili wa Akwilina umehamishiwa katika Hospitali hiyo ukitokea Hospitali ya Mwananyamala kwa ajili ya kufanyiwa uchunguzi.

Ndugu wa marehemu wamekusanyika hapo Muhimbili katika eneo la chumba cha kuhifadhia maiti, wakisubiri uchunguzi ukamilike ili kujua hatima ya kuusafirisha kwa ajili ya mazishi yatakayofanyika Wilayani Rombo Mkoani Kilimanjaro.

Moses Kiyeyeu aliyejitambulisha kuwa ni kaka wa marehemu alisema madaktari na wahusika wengine wanaendelea na utaratibu wa uchunguzi wa mwili.

"Mwili umefikishwa hapa tangu asubuhi na kule ndani kuna kaka yetu ndiye anashuhudia uchunguzi huo, wametuambia tutoke kwanza ndani watatuita baadaye ili kupewa taarifa nini kinafuata kuhusu mwili wa ndugu yetu”, alisema.

 

Hata hivyo Kiyeyeu aliongeza kuwa familia inasubiri uchunguzi ukamilike ili waruhusiwe kuuchukua mwili kwa kuwa wazazi wa Akwilina wanausubiri.