WAFUASI WATATU CHADEMA WAPANDISHWA KIZIMBANI WAKIDAIWA KUHARIBU GARI LA CCM

Na Mwandishi wetu,       

Songea.

WAFUASI watatu wa Chama Cha Demokrasia na Maendeleo (CHADEMA) katika Manispaa ya Songea mkoani Ruvuma wamepandishwa kizimbani katika Mahakama ya Hakimu mkazi mkoani humo, kwa tuhuma ya kula njama na kuharibu gari la Chama Cha Mapinduzi (CCM) kwa kulipiga mawe.

Mwanasheria kutoka Ofisi ya Mwanasheria mkuu wa serikali kanda ya Songea Tumaini Ngiruka aliwataja Mahakamani hapo washitakiwa hao kuwa ni Joseph Fuime (52) mkazi wa Songea mjini aliyewahi kuwa Mwenyekiti wa CHADEMA mkoani humo, Emmanuel Kalisinjesi (37) mkazi wa mtaa wa Ruvuma na Sedrick Komba (51) mkazi wa Bombambili mjini hapa.

Mwendesha mashtaka ambaye ni Mwanasheria huyo wa Serikali kanda ya Songea, Ngiruka alidai mbele ya Hakimu mkazi mwandamizi wa Mahakama ya mkoa wa Ruvuma, Issa Magori kuwa mnamo Januari 20 mwaka huu majira ya usiku katika eneo la mtaa wa Pambazuko uliopo nje kidogo ya Manispaa ya Songea washtakiwa hao waliharibu gari la CCM aina ya Landcruiser lenye namba za usajili T 640 BEU kwa kulipiga mawe na kusababisha kuvunjika kioo cha mbele ya gari hilo na upande wa dereva.

Ngiruka aliendelea kudai Mahakamani hapo kuwa uhalifu huo waliokuwa wameufanya watuhumiwa hao, walikuwa wakijua kwamba kutenda kosa hilo ni kuvunja sheria za nchi.

Alisema kuwa baada ya tukio hilo kulifanya washtakiwa wote watatu walikimbia ambapo walikamatwa baadaye na kufunguliwa mashtaka hayo.

Pamoja na mambo mengine washitakiwa hao wamekana mashtaka hayo yanayowakabili na kwamba wapo nje kwa dhamana ya wadhamini wawili waaminifu kila mmoja, hadi Februari 17 mwaka huu shauri hilo litakapotajwa tena.