PEMBEJEO ZA KILIMO ZIPELEKWE KWA WAKATI

Utafiti wa mbolea ya Minjingu Hyper pamoja na UREA

Na Mwandishi wetu,

Mbinga.

WAKULIMA wilayani Mbinga mkoa wa Ruvuma wameiomba serikali, kuwapelekea mapema pembejeo za kilimo(ruzuku) ili ziweze kutumika kwa wakati ikilinganishwa na misimu iliyopita, pembejeo hizo zilikuwa zikiwafikia kwa kuchelewa.

Wakulima wa kata ya Kihungu walisema kuwa kuchelewa kuwafikia kwa mbolea hizo, kumekuwa kukiwaathiri na kusababisha washindwe kuzalisha mazao mengi na hivyo kupata hasara.

Mkulima Aderick Komba alisema dhamira ya serikali ya kuwapatia mbolea za ruzuku ni nzuri, lakini imekuwa ikikabiliwa na vikwazo vingi katika usambazaji wake jambo ambalo mwisho wa siku humuumiza mkulima.

Bw. Komba alisema kuwa pamoja na kuchelewa kuwafikia kwa pembejeo hizo, bado kuna changamoto ya kutogawiwa kama inavyotakiwa kwani mara nyingi hawapati mbolea zote, ambapo wakati mwingine badala ya kupata mifuko mitatu hupata mmoja bila kutolewa maelekezo yoyote.

Naye mkulima Karitas Ndunguru alisema kuwa pamoja na malengo mazuri ya serikali mara nyingi wanaokwamishwa ni watendaji wa kata na vijiji, ambapo kwa kushirikiana na kamati za vocha za vijiji au kata, huwaibia wakulima huku wakimhusisha wakala aliyepewa dhamana ya kusambaza pembejeo.

"Serikali yetu inatujali sisi wakulima na ndio maana iliamua kutoa pembejeo za ruzuku ili kuwasaidia wakulima wadogo wadogo, lakini sasa tatizo lipo kwa wale ambao wamepewa dhamana ya kusimamia, ni vyema wakabadilika vinginevyo wataendelea kutukwamisha", alisema.  

Kwa upande wake ofisa mtendaji wa kijiji hicho Bw. Ombeni Mekasi alisema, tatizo kubwa linalowakabili wakulima ni ukosefu wa fedha za kulipia pembejeo pale zinapopelekwa na wakala katika maeneo yao, na kwamba baadhi yao huwauzia wafanyabishara mbolea hizo mara baada ya kukabidhiwa.

"Unajua pamoja na matatizo ya mawakala lakini pia nao wakulima mara nyingi wamekuwa wakikosa fedha za kulipia pembejeo, kutokana na hilo hujikuta wakirubuniwa kiurahisi na watu wenye fedha ambapo huwapa fedha kwa ajili ya kulipia na kumkabidhi huyo aliyewapa hizo mbolea au mbegu", alisema.

Aliwataka wakulima ambao watapata vocha za pembejeo za ruzuku, kutokubali kurubuniwa na wafanyabiashara au wakulima wenye uwezo badala yake wahakikishe wanazitumia mbolea hizo kwenye mashamba yao, ili waweze kuzalisha mazao kwa wingi.