WAFANYAKAZI WA KAMPUNI WADAIWA KUTAPELI WANANCHI TANESCO YATOA TAHADHARI KWA WATEJA WAKE

Na Mwandishi wetu,        

Songea.

SHIRIKA la Umeme Tanzania (TANESCO) mkoani Ruvuma, limewatahadharisha Wananchi wa mkoa huo hususan kwa wale wanaoishi vijijini kuwa makini na watu wanaotumia jina la shirika hilo, kuwatapeli fedha kwa kisingizio cha kuwaingizia umeme majumbani mwao kupitia Mpango wa Umeme Vijijini (REA) katika awamu hii ya tatu.

Aidha limewataka kuwa na mazoea ya kutoa taarifa kwa shirika hilo pale wanapoona kuna watu wanaokwenda kwenye maeneo yao, kwa kujifanya  maofisa wa TANESCO na kuanza kuchangisha fedha kwa kuwa wenye mamlaka ya kufanya hivyo ni shirika hilo na sio vinginevyo.

Hatua hiyo inafuatia tukio la hivi karibuni la maofisa wa shirika hilo kikosi cha usalama kwa kushirikiana na wananchi kuwatia mbaroni vijana wanne wa Kampuni ya Syba Electrical Service and General Enterprises inayofanya kazi ya ukandarasi wa umeme, yenye makao makuu yake mkoani Mwanza baada ya vijana hao kujitambulisha kama maofisa wa TANESCO wakiwa tayari wamekusanya zaidi ya shilingi 700,000 kutoka kwa wakazi wa kijiji cha Mbinga Mhalule wilayani Songea mkoani hapa.

Kwa mujibu wa taarifa iliyotolewa na Kaimu Meneja wa shirika la TANESCO mkoa wa Ruvuma, Mhandisi John Kiduko ni kwamba tukio hilo lilitokea  Disemba 24 mwaka jana majira ya saa nne asubuhi ambapo vijana hao walikamatwa na maofisa wa shirika hilo, kitengo cha usalama kwa kushirikiana na Jeshi la Polisi baada ya kupata taarifa kutoka kwa  raia wema.

Kiduko alifafanua kuwa watu hao walikamatwa baada ya kutiliwa mashaka na uwepo wao kijijini hapo, kwani walianza kukusanya fedha kwa kaya 17  sawa na shilingi 140,000 ambapo kwa kila kaya ilitoa shilingi 20,000 ikiwa ni gharama ya kuunganishiwa umeme kupitia Mpango wa Umeme Vijijini (REA).

Aidha Kiduko alifafanua kuwa siku hiyo ya Disemba 24 mwaka jana vijana hao  walirudi tena na kuanza kupita kwa kaya moja hadi nyingine ambapo walifanikiwa kukusanya shilingi 600,000 kutoka kaya 30, hata hivyo baadhi ya wananchi  hao waliwatilia mashaka vijana  hao na kuanza kutoa taarifa kwa Mwenyekiti wa kijiji  ambaye alipopiga simu TANESCO, waliwajulisha Polisi juu ya tukio hilo na hatimaye waliwakuta vijana hao na kuwaweka chini ya ulinzi wa wananchi ambapo walipohojiwa walisema wanatoka Kampuni ya Syba Electrical Service and General Enterprises  na kuweza kufanikiwa kuwakamata.

Kwa mujibu wa Kiduko alisema kwamba kwa kawaida hakuna mtu ambaye amepewa ruhusu ya kukusanya fedha ikiwa ni gharama za wananchi kuunganishiwa umeme, badala yake gharama hizo zinatakiwa kulipwa kwa shirika hilo tena watu kufika ofisini na kupatiwa risiti halali, hivyo amewatahadharisha wananchi kuwa makini na matapeli na  watu wenye nia ya kulichafua shirika la umeme Tanzania.

Aliongeza kuwa siku moja kabla ya kukamatwa kwa watu hao yaani Disemba 23 mwaka jana tayari walifanikiwa kukusanya kiasi cha shilingi 140,000 kwa kaya saba na siku ya pili ndipo walirudi tena kuendelea na wizi huo kwa kuwakatia wananchi risiti feki ambapo walifanikiwa kukusanya shilingi 600,000 kutoka kaya 30.

Kiduko ametoa wito kwa vyombo vya habari vilivyopo mkoani Ruvuma, kusaidia kuujulisha umma wa Watanzania juu ya kuwepo kwa matapeli wa aina hiyo ambao wameanza kupita vijijini na kuwadhulumu wananchi fedha zao wakitumia jina la Tanesco.

Vilevile alisema kuwa kabla ya kuanza kwa utekelezaji wa mpango wa REA awamu ya tatu,Tanesco itafanya mikutano katika vijiji vyote vitavyoingizwa katika mpango huo na  itafungua ofisi ndogo katika kila kijiji na kuwajulisha wananchi  kuhusiana na utaratibu wake ambapo zaidi ya vijiji 437  katika mkoa wa Ruvuma, vitapata umeme kupitia mpango huo.

Akijibu tuhuma hizo Mkurugenzi wa Kampuni ya Syba Electrical Service and General Enterprises, Silvester Jumanne alikana kuwepo kwa tukio hilo na kusema kwamba hakuna mfanyakazi wake aliyekamatwa kuhusiana na tukio hilo kwani kazi waliyopewa na Tanesco ni kufanya wayaringi majumbani na sio kuingiza umeme majumbani.

Alisisitiza kuwa hao ni watu matapeli wanaotaka kuchafua jina la shirika hilo na amewataka TANESCO kuongeza nguvu katika kuwasaka watu wanaofanya utapeli wa aina hiyo kwa wananchi.

“Nashauri hao vishoka wanaojifanya ni Kampuni ya Syba wapelekwe tu mahakamani mimi siwafahamu kabisa na mimi sijawahi kufika huko na sipafahamu Mbinga Mhalule”, alisema Jumanne.