WANUSURIKA KUPOTEZA MAISHA BAADA YA KUNYWA KINYWAJI KINACHOSADIKIWA KUWA NA SUMU

Na Kassian Nyandindi,

Songea.

WATU watano akiwemo na mtoto mdogo mwenye umri wa mwaka mmoja, ambao ni wakazi wa kijiji cha Mapipili wilayani Mbinga mkoa wa Ruvuma wamenusurika kupoteza maisha, baada ya kunywa kinywaji ambacho kinasadikiwa kuwa na sumu.

Kwa mujibu wa Kamanda wa Polisi wa mkoa huo, Mihayo Msikhela alisema kuwa watu hao walikunywa kinywaji aina ya togwa wakati walipokuwa shambani wanalima.

 

Msikhela alifafanua kuwa tukio hilo, lilitokea Novemba 20 mwaka huu majira ya mchana baada ya kunywa kinywaji hicho walianza kujisikia vibaya, ambapo walikuwa wanaharisha na kutapika.

“Walipoanza kuharisha na kutapika, walichukua jukumu la kupeleka taarifa kwa mtendaji wa kijiji cha Mapipili aitwaye Neema Mponda, ndipo Polisi tulipopata taarifa hizi tulikwenda huko kuwachukua na kuwafikisha Hospitali ya wilaya ya Mbinga, kwa ajili ya matibabu zaidi”, alisema Msikhela.

Kwa upande wake akizungumza kwa njia ya simu na mwandishi wetu, mganga mfawidhi wa Hospitali hiyo Robert Elisha alithibitisha juu ya tukio hilo na kuwapokea huku akiwataja kwa majina kuwa ni Edda Komba (25), Adelina Nchimbi (23), Paulina Komba (21), Stamily Mapunda (21) na mtoto mmoja mdogo Stella Komba mwenye umri wa mwaka mmoja.

Elisha alibainisha kuwa hali zao zinaendelea vizuri na kwamba kinywaji walichokunywa aina ya togwa kiliwasababishia maumivu ya tumbo na wakaanza kuharisha na kutapika.

“Tumechukua hatua za haraka kuwapatia matibabu, lakini hatuja ona katika kile kinywaji kama kulikuwa na sumu na watu hawa bado wapo chini ya uangalizi wa madaktari wanaendelea vizuri na afya zao zitakapoimarika, wataruhusiwa kwenda makwao”, alisema.