 |
| Padre Baptiste Mapunda. |
Na Padre Baptiste Mapunda,
TAREHE mosi mwezi Februari mwaka huu, Chama Cha Mapinduzi
(CCM) kilisherehekea siku yake ya kuzaliwa ikitimiza miaka 38. Kawaida mtu mwenye
umri huu sio mtoto tena, bali ni mtu mzima anayepaswa kuwajibika katika maisha
yake na ya wenzake.
Sikukuu hii ya kuzaliwa kwa CCM kwa kawaida inafanyika tarehe
5 mwezi Februari ambapo mwaka huu
ingeangukia siku ya alhamisi, lakini cha kushangaza ilirudishwa nyuma na
kuadhimishwa siku ya Bwana yaani Jumapili,
kwa sababu zipi bado
hazijulikani, lakini inaruhusiwa.
Mimi binafsi nilibahatika kuwa katika mji huu wa Songea mkoani Ruvuma, huko ni nyumbani kabisa, “kunyumba”.
Ni heshima kubwa sana kwa mkoa huo, kupewa nafasi ya kuandaa sherehe ya kitaifa kama hii,
pia ni nafasi nyeti na kila mkoa
inatafuta. Bado haikufahamika kigezo cha kupeleka sherehe hizi mkoa wa Ruvuma, ambao
kimaendeleo bado upo nyuma katika nyanja mbalimbali kaqma vile elimu, afya,
miundo mbinu ya barabara maji, umeme, na kipato cha wananchi wake na mwamko
katika demokrasia na siasa za mageuzi.
Umati wa wananchi waliojaa katika uwanja wa maji maji haukuwa
haba, lakini kwa upande mmoja ukipita
mitaani uliweza kuona watu wengi
wakiendelea na shughuli zao huku wengine wamefungua maduka, sokoni nako kunafurika watu, boda boda wamejipanga nakadhalika.
Nilipojaribu kudodosa baadhi ya wananchi inakuwaje uwanja
umefurika na wanasongea wanaonekana barabarani, jibu nililopewa ni kwamba; “watu
waliofurika ndani ya uwanja wa maji maji
walikuwa wameletwa na malori na mabasi kutoka katika kila kata ndani ya
mkoa huo”.
“Padre Mapunda, hawa
watu waliofurika hapa uwanjani sio wanasongea pekee, bali wengi wao wametoka
mkoa mzima labda na hata kanda ya nyanda za juu kusini. Ndani ya mkoa kila kata waliletwa watu kumi na pia shule zote za msingi na sekondari hapa
mjini, waliamrishwa lazima wahudhurie na sharti
wafike bila uniform”, alifahamisha
mwananchi mmoja.
Leo hoja yangu sio watu waliofurika tu, nikijua kwamba mkoa wa Ruvuma hauna matukio mengi ya kitaifa kama
hayo kwa hiyo tukio kama hilo, wanaruvuma wengi wangelipenda kuhudhuria. Mimi
hoja yangu kubwa leo ni hotuba
iliyotolewa na mheshimiwa Rais wetu Jakaya Kikwete, kwa upande wangu hotuba ile
ilikuwa imejaa hofu ya uchaguzi mkuu unaotarajiwa kufanyika mwezi Oktoba mwaka
huu.
Mwezi Oktoba mwaka huu Watanzania, tutapata tena fursa ya
kumchagua Rais wetu mpya wa awamu ya tano, ambaye atakuwa mrithi wa Rais tuliyekuwa
naye sasa.
Ni wazi huu ni uchaguzi wa kihistoria, kwanza kwa sababu
unatanguliwa na kura ya maoni ya katiba mpya iliyopendekezwa ambayo mimi naiita,
“katiba haramu ya CCM”. Ni haramu kwa sababu ni katiba iliyotupilia mbali maoni
ya wananchi wake chini ya tume ya Warioba na wakapachika maoni wanayotaka wao wanaccm, kwa nini
isiitwe haramu na pandikizi?
Lakini pia ni uchaguzi wa kihistoria kwa sababu ya ukomavu wa mfumo wa vyama vingi,
ambapo ukichunguza nchi yetu hivi sasa ni
takribani miaka 20 imepita tangu mfumo wa vyama vingi ulipokubaliwa uwepo na
Baba wa taifa, hayati mwalimu Julius Nyerere kinyume na matakwa ya wengi
waliokataa.
Vyama vya upinzani vimekomaa kwa kiasi kikubwa, na vinatoa changamoto
kubwa sana kwa chama cha mapinduzi kiasi cha kuwa tishio.
UKAWA unaendelea kuwa tishio kwa chama tawala, pamoja na
porojo au propaganda zake zote, umoja huu unaonekana kukomaa kila kukicha. Je
mwisho wa umoja huu ni nini? lakini tunajua kwamba Baba wa taifa hayati mwalimu
Nyerere alitufundisha kwamba, “umoja ni nguvu”.
Kutokana na nguvu, mbinu na hamasa wanayoionyesha WANAUKAWA,
CCM imekumbwa na kihoro juu ya uhai wake hasa wakati huu tunakoelekea uchaguzi
mkuu. Hii ilisababisha Mwenyekiti wake wa CCM taifa ambaye ni Rais Kikwete atoe hotuba ya hofu ya uchaguzi mkuu mwaka
huu.
Pamoja kwamba alifurahia umati uliojaa pale uwanja wa maji maji, ulipambwa na halaiki
ya wanafunzi hotuba ya mheshimiwa Rais, hakuficha hisia zake za hofu ya uchaguzi
unaokuja.
Mtu aliyesoma saikolojia kidogo, atatambua mara moja kwamba
hotuba ya Rais Kikwete kama Mwenyekiti wa CCM taifa ilijaa hofu. “CCM bado
ni imara na tutashinda kwa kishindo,
lakini tusibweteke.” Maneno haya ni mazito kwa kiongozi mkuu kama yeye.
Aliendelea kuwaasa wanaccm kwamba, “katika kampeni msichukue
kila pesa, pesa zingine zina moto mtakuja kuungua”, alisema. Mwenyekiti huyo alikwepa
kabisa kutumia neno la “Escrow” likimaanisha wizi wa mabilioni ya pesa uliotokea
hivi karibuni na kusababisha baadhi ya viongozi wa serikali yake kama
Mwanasheria mkuu, Waziri wa ardhi na Waziri wa nishati na madini kujiuzuru.
Mimi najiuliza, ile hofu iliyoonekana katika hotuba ya Rais
wetu ilipata majibu kule Songea? kwa upande mmoja sikuona
alama ya mwitikio na hamasa kubwa ya wananchi katika salamu na vibwagizo
mbali mbali.
Bado sijafahamu ni kiashirio gani wanaruvuma walitoa kwa kiongozi wao hata
akaanza kupata hofu. Nionavyo mimi hofu hii inaweza kutokana na ukweli kwamba viongozi wengi wa CCM na serikali
wamezoea kuiona Ruvuma kama sehemu ya kuvuna kura nyingi, lakini huenda
walishituka kuona mwamko ni kidogo.
Wakulima wa mahindi wamekuwa na malalamiko kibao juu ya
kulipwa pesa zao, ruzuku za mbolea zimekuwa zikitolewa kwa rushwa na
pengine kuchakachuliwa kabisa. Je, hawa wanaruvuma
wanaweza kuendelea kukipenda chama chao kama zamani?
Nimalize kwa kuuliza swali lile lile, je hotuba ya Kikwete iliyojaa hofu ya uchaguzi msingi wake ni nini
kule Songea? na je Mwenyekiti huyu wa CCM taifa anafahamu kwamba hotuba yake, ilijaa hofu ya uchaguzi mkuu na
uwezekano wa kuanguka kwa chama chake katika uchaguzi ujao?
Mwandishi wa makala haya anapatikana kwa barua pepe; Frmapunda91@gmail.com
No comments:
Post a Comment