Na Kassian Nyandindi,
Songea.
MTU mmoja ambaye ni mkazi wa Bombambili Manispaa ya Songea
mkoani Ruvuma, Peter Christopher (35) amekutwa akiwa amefariki dunia huku
sehemu zake za siri zikiwa zimevalishwa mpira wa kiume maarufu kwa jina la
Kondomu ambayo ilikutwa ikiwa imekwisha tumika.
Habari zilizothibitishwa na Kamanda wa Polisi wa mkoa huo,
Zubery Mwombeji zinasema kuwa mwili wa marehemu huyo ulikutwa hivi karibuni majira
ya mchana kwenye pori lililopo eneo la Making’inda, kata ya Msamala mjini hapa.
Kamanda huyo alisema kuwa Christopher alikutwa amefariki
dunia, mwili wake ukiwa hauna jeraha la aina yeyote badala yake alikutwa akiwa amevaa
mpira huo kwenye uume wake, huku mpira mwingine ukiwa bado haujatumika ambao ulikutwa
kwenye mfuko wake wa suruali ambayo ilikuwa kando kando ya mwili wake.
Alisema kuwa mpaka sasa bado haijafahamika chanzo cha tukio
hilo, licha ya kwamba taarifa za awali kutoka kwa ndugu wa marehemu huyo
zinaeleza kuwa tangu Mei 17 mwaka huu alitoweka nyumbani kwake, ambapo baadaye
walichukua jukumu la kutoa taarifa kituo kikuu cha Polisi Songea mjini huku juhudi
za kumtafuta zilipokuwa zikiendelea walifanikiwa mwili wake kuupata katika eneo
hilo la Making’inda.
Mwombeji alifafanua kuwa mwili huo ulipopatikana, ndugu
waliweza kuutambua ambapo baada ya uchunguzi wa madaktari kufanyika kwa
kushirikiana na Polisi, walibaini kwamba haukuwa na majeraha yoyote na baadaye waliukabidhi
kwa ndugu zake kwa ajili ya mazishi.
Hata hivyo Kamanda huyo wa Polisi mkoa wa Ruvuma, alisema
kuwa wanaendelea na uchunguzi kufuatia kutokea kwa tukio hilo huku akitoa mwito
kwa wananchi, kuendelea kutoa ushirikiano wa karibu kwa jeshi hilo ili kuweza
kubaini chanzo cha kifo chake.
No comments:
Post a Comment