CHADEMA RUVUMA YAPINGA KATAZO LA JESHI LA POLISI YASEMA MAANDALIZI OPARESHENI UKUTA YAMEKAMILIKA KWA ASILIMIA 99

Na Kassian Nyandindi,          

Songea.

CHAMA Cha Demokrasia na Maendeleo (CHADEMA) mkoani Ruvuma kimesema kwamba kinapinga vikali katazo la vikao vya ndani vya chama, lililotolewa na Jeshi la Polisi hapa nchini kupitia kwa Mkuu wa Oparesheni na mafunzo  ya jeshi hilo, CP Nsato Marijani.

Akizungumza na mwandishi wetu jana ofisini kwake Mwenyekiti wa CHADEMA mkoani hapa, Ireneus Ngwatura alisema kuwa tayari maandalizi yao ya Oparesheni UKUTA mkoani hapa yamekamilika kwa asilimia 99.

“Kuhusu katazo hili la vikao vya ndani ambalo limetolewa na Jeshi la Polisi kwamba kuanzia Agosti 24 mwaka huu ni marufuku kufanya vikao vya ndani vya kisiasa kwa vyama vya siasa, jambo hili kwetu halikubaliki kabisa na wala hakuna mwanachama yeyote atakayeridhia katazo hili”, alisema Ngwatura.

Alieleza kuwa nchi haiendeshwi kwa kauli za Jeshi la Polisi bali inaendeshwa kwa Katiba ya Jamhuri ya Muungano wa Tanzania na sheria zake mbalimbali, hivyo hakuna sheria yoyote ya Polisi au ya vyama vya siasa inayoruhusu kupiga marufuku vikao vya ndani na mikutano ya hadhara.

Ngwatura alieleza kuwa viongozi wa mkoa wa Ruvuma wa CHADEMA wameona kuna umuhimu wa kuwahimiza wanachama wake wa wilaya zote, kwamba ifikapo Septemba Mosi mwaka huu kutakuwa na maandamano kama yalivyopangwa na si vinginevyo.

Alisema kuwa kabla ya siku hiyo ya maandamano, wanatarajia kufanya mikutano ya ndani katika kila wilaya zilizopo mkoani humo ambapo wataanzia ngazi ya kijiji, kata, wilaya na mkoa.

Vilevile Ngwatura alisema jambo la pili ambalo anapenda kulifikisha kwa Watanzania wote ni kuhusu Oparesheni UKUTA inayotarajiwa kufanyika Septemba 1 mwaka huu, ambayo ni moja kati ya maazimio ya kikao cha Kamati Kuu ya Chama Cha Demokrasia na Maendeleo Taifa, kilichofanyika Julai 23 hadi 26 mwaka huu maandamano ya mikutano ni lazima yafanyike na kwamba ni haki ya mwananchi kikatiba na kisheria kufanya hivyo.

Kwa upande wake Kamanda wa Polisi wa mkoa wa Ruvuma, alipohojiwa kuhusiana na sakata hilo la maandamano hayo alisema kuwa Jeshi la Polisi mkoani humo lilikwishawapelekea CHADEMA mkoa wa Ruvuma zuio la kuwataka wasifanye mikutano ya ndani na maandamano yoyote yale ya kichama, ambayo wanatarajia kuyafanya na badala yake amewahimiza kuona umuhimu wa kwenda kufanya kazi ili kuwaletea maendeleo wananchi wakiwemo wanachama wao.

Kamanda Mwombeji alisisitiza kuwa mwanasiasa yeyote atakayekaidi zuio hilo atashughulikiwa kisheria na kwamba kwa mtu yeyote mwenye uelewa anapaswa aheshimu katazo hilo na sio vinginevyo.