GAMA: MABADILIKO HAYA NI YA KUDUMU ENDELEVU NA WALA SIO NGUVU YA SODA

Na Muhidin Amri,        

Songea.

MBUNGE wa Songea mjini mkoani Ruvuma Leonidas Gama amewaeleza wakuu wa idara halmashauri ya Manispaa Songea kwamba, nchi ya Tanzania hivi sasa imebadilika na mabadiliko hayo ni ya kudumu, endelevu na wala sio nguvu ya soda hivyo wanapaswa kuacha tabia ya kufanya kazi kwa mazoea badala yake wanapaswa kuwatumikia wananchi ipasavyo.

Leonidas Gama.

Gama alisema hayo juzi alipokuwa akizungumza na wakuu hao wa idara akiwa ameambatana na Meya wa Manispaa hiyo Abdul Mshaweji, katika kikao kilicholenga kupanga mikakati itakayosaidia kujenga ubunifu wa kuboresha vyanzo vya mapato na kukuza uchumi wa manispaa hiyo kwa manufaa ya jamii.

“Tanzania ni nchi ambayo imebadilika na mabadiliko haya ni ya kudumu, sio nguvu ya soda, Rais Dkt. John Magufuli hapendezwi na mambo yaende hovyo hovyo, hivyo watumishi mnapaswa kuacha kufanya kazi kwa mazoea”, alisema.

Pia alisisitiza kwa kuwataka wataalamu hao kuangalia namna ya kuondoa kero za wananchi ikiwemo ukarabati wa barabara kwenye mitaa na kata, kero ya maji safi na salama, kushughulikia migogoro ya ardhi na kuzuia vitendo vya ujenzi holela.

Katika hatua nyingine Mbunge huyo, amewaagiza watendaji hao kukusanya mapato kwa utaratibu uliowekwa na serikali kwa kutumia mfumo wa mashine za Kieletroniki (EFD’S), ambao hudhibiti mapato ya serikali na hatimaye kuweza kusaidia kuboresha huduma za wananchi.

Kwa upande wake Meya wa Manispaa ya Songea, Abdul Mshaweji  amewapongeza watumishi hao kwa kazi ya kusimamia maendeleo ya wananchi, lakini aliwataka kuhakikisha mpango kazi mpya unaoanza mwaka huu wa fedha kuhakikisha malengo yake yanatekelezwa ipasavyo.

“Ninyi wakuu wa idara ndiyo nguzo muhimu ya maendeleo ya wananchi, hivyo nawataka msichanganye utaalamu mlionao na mambo ya kisiasa, ili tuweze kutoka hapa tulipo tunahitaji kuchapa kazi kwa kujituma”, alisisitiza Mshaweji.

Ameagiza kuzingatia na kuheshimu sheria ndogondogo zilizowekwa ndani ya Manispaa hiyo, ikiwemo kujenga ubunifu wa vyanzo vipya vya mapato na kuwa na nidhamu nzuri ya matumizi ya fedha za serikali.