WANANCHI LITAPASWI SONGEA WANYWA TOGWA INAYODAIWA KUWA NA SUMU

Na Mwandishi wetu,          

Songea.

BAADHI ya wananchi wa kijiji cha Lyangweni kata ya Litapwasi wilaya ya Songea mkoani Ruvuma, wamekumbwa na hali mbaya baada ya kuhofiwa kunywa kinywaji aina ya togwa kinachodaiwa kuwa na sumu.

Wananchi hao ambao ni 66 walikunywa kinywaji hicho wakati walipokuwa kwenye sherehe ya mwananchi mwenzao, ambaye jina lake halikuweza kufahamika mara moja.

Habari zilizopatikana mjini hapa ambazo zimethibitishwa na Mganga mkuu wa wilaya hiyo Dkt. Yesaya Mwasubira, alisema kuwa tukio hilo lilitokea juzi majira ya mchana huko katika kijiji cha Lyangweni ambacho kipo umbali wa kilometa tisa kutoka Songea mjini.

Alisema kuwa wanakijiji hao walikuwa wamekwenda kwenye sherehe hiyo, ambako walipatiwa chakula pamoja na kinywaji aina ya togwa iliyotengenezwa kienyeji.

Kadhalika baadhi ya wananchi waliozungumza na mwandishi wetu kwa nyakati tofauti walisema kuwa togwa hiyo, ilikuwa imeandaliwa kwa wingi kwenye sherehe hiyo na kila aliyekunywa baada ya muda mfupi tu, alianza kulalamika kuuma tumbo.

Walisema kuwa baadaye wote waliokuwa wamekunywa, hali zao zilizidi kuwa mbaya ndipo uongozi wa kijiji ulilazimika kuchukua hatua kwa kutoa taarifa kwenye Ofisi ya mtendaji wa kata, ambaye ndiye aliyechukua hatua ya kuwasiliana na uongozi wa halmashauri ya wilaya ya Songea juu ya tukio hilo.

Walifafanua kuwa baada ya masaa matatu kupita, timu ya wataalamu wa afya iliwasili kijijini hapo na kuanza kutoa huduma ya kwanza kwa waathirika wote ambao walifikishwa kwenye zahanati ya kijiji cha Lyangweni, walipatiwa matibabu na kuruhusiwa kurudi majumbani kwao licha ya kwamba hali zao zilikuwa bado sio nzuri.

Mwenyekiti wa halmashauri ya wilaya ya Songea ambaye pia ni diwani wa kata ya Litapwasi Rajabu Mtiura alipoulizwa kwa njia ya simu kuhusiana na tukio hilo, alisema tayari waathirika wote waliokunywa togwa hiyo wametibiwa na wanaendelea kupata matibabu katika zahanati hiyo.

“Tukio hilo ni la pili kutokea hapa kwetu, la kwanza lilitokea mwaka mmoja uliopita katika kijiji cha Litapwasi wanakijiji zaidi ya 200 waliokuwa kwenye sherehe ya Kipaimara, waliugua matumbo yao na kulazwa kwenye kambi maalumu baada ya kunywa togwa iliyodaiwa kuwa inasumu”, alisema Mtiura.

Vilevile Mganga mkuu wa wilaya hiyo, Dkt. Mwasubira alifafanua kuwa wagonjwa waliofika kwenye Zahanati hiyo wamepewa dawa za kutosha na hali zao zinaendelea vizuri na kwamba timu ya wataalamu wa afya, bado wapo kwenye kijiji hicho wakisubiri kuangalia afya za waathirika hao.

“Tayari hatua zimechukuliwa kwa kuchukua sampuli na masalia ya kinywaji hiki walichokunywa aina ya togwa, kwa ajili ya kupeleka kwa mkemia mkuu wa serikali ili tuweze kubaini chanzo cha tukio hili”, alisema.

Jitihada ya kumpata Kamanda wa Polisi wa mkoa wa Ruvuma, Zubery Mwombeji ziligonga mwamba baada ya simu yake ya kiganjani kuita kwa muda mrefu bila kupokelewa.