Na Kassian Nyandindi,
Mbinga.
JAMII wilayani Mbinga mkoa wa Ruvuma, imetakiwa kuhakikisha
inachukua tahadhari mapema juu ya ugonjwa hatari wa malaria ambao unatajwa
kuongoza kuwaua watu wengi, hapa nchini.
Rai hiyo imetolewa na Kaimu mganga mkuu wa wilaya hiyo, Adela
Mlingi alipokuwa akizungumza na waandishi wa habari ofisini kwake ambao
walitembelea Hospitali ya wilaya ya Mbinga kujionea mkakati wa
serikali katika kudhibiti magonjwa hatari ikiwemo malaria, kipindupindu, maambukizi
mapya ya Virusi Vya Ukimwi (VVU), vifo vya akina mama wajawazito na watoto walio
chini ya umri wa miaka mitano.
Mlingi alisema kulingana na ukubwa wa tatizo la ugonjwa
huo, jamii inapaswa kutambua kwamba ni wajibu wao kuchukua tahadhari
ya magonjwa hayo mapema, badala ya kuiacha serikali peke yake ambayo kwa
upande wake imejitahidi kwa kiasi kikubwa kupambana nayo kwa kutafuta dawa na
vifaa tiba.
Alisema ugonjwa wa malaria kwa kiasi kikubwa unaambukizwa na
mbu, hivyo wananchi wanahimizwa kutumia chandarua chenye dawa kila wanapokwenda
kulala, ili kujikinga na ugonjwa huo hatari ambao unasababisha kupungua kwa
nguvu kazi ya taifa.
“Watu wengi wanauchukulia ugonjwa huu wa malaria, kama
ugonjwa wa kawaida huku wakisahau kwamba ndiyo unaongoza kwa vifo vingi
kuliko hata ukimwi”, alisema Mlingi.
Kutokana na hali hiyo, amewataka wananchi katika wilaya ya
Mbinga pindi wanapohisi homa kwenda haraka hospitali kwa ajili ya kupata
vipimo, ushauri na matibabu badala ya kuamua kumeza dawa bila ya kujua homa
yake, jambo ambalo linaweza kuleta madhara makubwa kwao kiafya.
Mlingi alifafanua kuwa hivi sasa wananchi wanapaswa
kubadilika kitabia na kuzingatia taarifa mbalimbali zinazotolewa na wataalamu
wa afya, hatua ambayo itasaidia kuacha tabia ya kunywa dawa za
malaria na magonjwa mengine bila kupata vipimo sahihi.
No comments:
Post a Comment