Na Amona Mtega,
Songea.
OSWALD Komba (61) maarufu kwa jina la Kibastola, mkazi wa
kijiji cha Lipaya wilaya ya Songea mkoani Ruvuma, anashikiliwa na jeshi la polisi mkoani humo, kwa tuhuma ya kujihusisha na biashara haramu ya bhangi ambayo alishikwa na miche mingi, ikiwa imepandwa kwenye shamba ambalo inadaiwa
kuwa ni la kwake lenye ukubwa wa ekari moja.
Kamanda wa polisi wa mkoa huo, Mihayo Msikhela alisema kuwa
tukio hilo lilitokea Februari 20 mwaka huu majira ya mchana, huko katika
kitongoji cha Kilombero kijiji cha Lipaya wilayani humo.
Msikhela alisema kuwa baada ya kupata taarifa kutoka kwa raia
wema, jeshi la polisi lilikwenda kijijini hapo na kuendesha msako mkali ndipo
walipobaini shamba hilo lenye miche mingi ya bhangi, ambalo nila mtuhumiwa
huyo.
Alisema kuwa baada ya kuliona shamba hilo, polisi majira ya
saa nane mchana waliingia shambani humo na kuing’oa na baadaye kuteketezwa kwa moto.
Mtuhumiwa hivi sasa anashikiliwa katika kituo kikuu cha Polisi
Songea mjini, na kwamba wakati wowote kuanzia sasa atafikishwa mahakamani, kwa
ajili ya kujibu tuhuma inayomkabili.
Hata hivyo Kamanda huyo wa polisi mkoani Ruvuma, amewataka wananchi
kuendelea kuwa raia wema, kwa kufichua maovu ambayo yanafanywa na watu
wasiolitakia mema taifa hili.
No comments:
Post a Comment